容祖兒生日派對被男粉絲表白為「前世情人」 預告出自家燒鵝月餅做善事

今日（16日）是容祖兒正日生日，她特別推出今年首支派台歌《但你要甜》贈興，昨日更率先與近千名來自世界各地的粉絲開Party慶祝，不但首唱新歌兼首播MV，又落台跟fans握手，玩遊戲期間更有男粉絲趁機表白話係「前世情人」，令祖兒笑到見牙唔見眼。

祖兒揭新歌MV小朋友全是熟人的子女

祖兒分享新歌構思，「我發覺我啲歌迷都大個啦，見住班fans細個着住校服追星，到𠵱家帶埋仔女嚟追！希望佢哋嘅小朋友都唔會太抗拒我啦，哈哈！」又表示：「身邊嘅好朋友、同學每次聚會都帶埋好多小朋友，我細佬又有兩件啦，每次見到呢啲場面，我都好希未來新一代嘅小朋友，無論個世界有開心、唔開心、有好多挑戰，佢哋應該要成為一粒糖，可以茁壯成長為我哋未來嘅棟樑，甜住成長！」更自爆MV中的小朋友全部都是朋友及細佬的仔女，「佢哋有演技㗎！等十年後睇返一定好有趣！」

祖兒在生日會演唱新歌《但你要甜》。

祖兒在生日會分享新歌的構思。

祖兒獲男粉表白是「前世情人」，即笑到見牙唔見眼。

祖兒在台下同粉絲齊齊玩小遊戲。

祖兒親自為成立18年的歌迷會各地區組長頒獎。

祖兒不忘與到場的粉絲合照留念。

祖兒大愛「Candy Crush」造型的生日蛋糕。

祖兒透露會推出自家月餅。

生日會上，有小朋友被抽中上台玩「估歌仔」遊戲，兩位小朋友戴着耳筒唱祖兒的歌，被抽中的10位歌迷竟然只答中兩題，十分搞笑；玩「爭櫈仔」時，個個粉絲都「讓座」給祖兒，獲得「關愛座」的她說：「喂！你哋唔使專登讓我㗎！」最後祖兒在「被讓座」的情況下，勉強殺入三強就止步。此外，遊戲環節「假如我是容祖兒」最爆笑，有男粉絲突然深情告白：「我晚晚發夢都見到同你同台，今日終於夢想成真！我哋可能係前世情人嚟㗎！」𠱁到祖兒笑唔停。

揚言下年去啟德搞生日會

此外，祖兒又頒獎給成立18年的歌迷會各地區組長，答謝多年來的付出及支持。
在全場大合唱生日歌及切蛋糕時，祖兒感動表示：「今朝早五點起身，懷住一個好興奮嘅心情，多謝大家抽時間同我慶祝，人大咗更珍惜同朋友相聚嘅時間。」笑言下次要去啟德搞個更勁的生日會！她又預告今年中秋節會推出自家月餅，「扣除所有嘅開支之後，亦都係要嚟做善事嘅，可能會出燒鵝味，請大家多多支持，哈哈！」