馮允謙處男澳門個唱除衫晒麒麟臂 不乏男粉絲大嗌力撐 孖生細佬與母親捧場

「唱作王子」馮允謙（Jay）首度衝出香港開騷，上周六於澳門倫敦人綜藝館舉行《the SOUNDTRACK of my LIFE 馮允謙演唱會澳門站》，全場爆滿。Jay獲媽媽、孖生細佬Tim及圈中好友「頭號追風」劉沛蘅（Hillary）、黃正宜（阿正）、陳考威和未婚妻陳穎欣（Yanny）等前來澳門捧場，非常熱鬧。

馮允謙自彈自唱冧歌迷

Jay以七彩閃片長褸型格出場，他邊彈結邊唱《尋找隱世巨聲》、《A New Day》和《入場人士注意》為演唱會揭開序幕，現場觀眾更全場企起身叫喊，尖叫聲震懾整個倫敦人綜藝館，更不乏男粉絲不斷大嗌Jay的名字。Jay向觀眾打招呼後感激表示：「今次嚟到澳門開騷，對我嚟講係夢想成真，我冇諗過可以喺呢個舞台唱歌畀你哋聽，多謝你哋畀機會我衝出香港。」全場報以熱烈掌聲。Jay之後又唱又跳兼除衫騷麒麟臂，掀起全場高潮。除獻唱新歌《你是我的回憶殺》外，在Encore環節中，Jay更應粉絲要求加唱新歌《然之後》，寵粉程度爆燈。

演唱會上，Jay鳴謝團隊後感性分享，說：「入咗行一段時間，我嘅演藝路比較上未必好順利，允謙我好幸運，隔咗一段時間終於可以開騷，我真係估唔到可以嚟到澳門開騷，我知道好多香港，或者其他地方嘅朋友特登嚟支持我，多謝你哋，希望我哋可以好快再見。」

馮允謙第一次在澳門開唱。

雷同二友為演唱會表演。

馮允謙第一次澳門個唱除衫晒麒麟臂。

馮允謙寵粉無限，加唱新歌《然之後》。

馮允謙變白馬王子。

演唱會上，不乏男粉絲大嗌馮允謙的名字以示支持。

馮允謙唱《尋找隱世巨聲》、《A New Day》等令樂迷聽出耳油。

馮允謙Show前拜神，祈求一切順利。

馮允謙的媽媽與孖生細佬Tim現身支持。

當然唔少得冧粉絲心心手勢。

圈中好友黃正宜（阿正）與「頭號追風」劉沛蘅（Hillary）前來捧場。

馮允謙說澳門騷爆場猶如強心針。

開Show前團隊大嗌一聲，為彼此加油。

馮允謙澳門Show爆場

Jay於騷後接受訪問時難掩興奮，說：「觀眾反應好熱烈，真係冇得頂，好想多謝佢哋！今次衝出香港開騷係夢想成真，希望可以將呢個騷帶去唔同地方，令更多人睇到。」見到全場燈海一刻，Jay坦言覺得很夢幻：「每次瞇埋眼，再擘大眼見到個咁靚燈海係會嚇一跳。我冇Expect過原來有咁多人咁齊心去支持我，原來佢哋一直喺我身邊，好感動。」問到下一站想去邊度開騷？Jay笑言：「任何地方，任何形式，只要可以唱歌我就開心。」