原來視咁的丨朱敏瀚日操夜操打造完美體型勁吸睛 47歲楊卓娜為角色學跳Pole Dance

由徐正康及新晉監製林瑋澄聯合監製、翁善瑩編審的純愛小品劇集《虛擬情人》，將接棒《奪命提示》於周一至周五晚8點半翡翠台播映，主要演員有王敏奕、朱敏瀚（朱仔）、黃子恆、譚嘉儀、林景程、楊卓娜等。故事除圍繞程晴（王敏奕飾）與Adam（朱敏瀚飾）之間疑幻似真的浪漫愛情，虛擬Adam來到現實世界所遇到的衝擊及產生的化學影響，亦是重點劇情之一。

女主角程晴是虛擬情人平台「Love Virtually」創辦人兼首席技術長，讀書時因有感坊間正常筍盤極少，遂利用自身AI知識打造「虛擬完美情人」Adam；10年間，Adam在虛擬世界爆紅，「Love Virtually」另一創辦人井俊二（黃子恆飾）銳意推出以性感肌男做主打的7.0 version乘勝追擊！「完美肌男」版Adam Body相當屈機，除背脊肌肉紋理清晰、結實有致，44吋胸肌更是相當震撼。

朱仔已經成為TVB小生的性感擔當，幾乎每套劇都要除衫。

拍《虛擬》時，是朱仔最弗的時候。

除了有肌肉造型，當然亦有官仔骨骨的斯文look。

朱仔透露自2012年拍畢劇集《拳王》後，便養成keep住每天去健身室鍛鍊的習慣，朱仔說：「其實好嘅身體狀態都係一個藝人嘅條件之一，咁當時我拍完《拳王》之後，我覺得自己個膊頭同埋背肌都比較弱，所以都有針對呢兩個部位下咗啲苦功，因為都想個比例靚啲。拍呢套劇《虛擬》嘅時候，應該係我最弗嘅時候。」朱仔又笑言為在鏡頭前保持最佳狀態，拍攝場口亦被他善用為流動健身室：「我會成日問啲crew攞啲重嘅拍攝道具嚟做gym，劇組仲特登喺廠畀咗我一個做gym嘅area。」

跟《奪命》相差甚大

《虛擬情人》劇中人氣高企的Adam有3大鐵粉，其中一位是由近期演技屢獲好評的楊卓娜飾演的Audrey；Audrey因為Pole Dance結識了丈夫Norman（黃子雄飾），可惜亦同樣因為Pole Dance與丈夫之間的罅隙越來越大，為了拍攝效果，現年47歲的娜姐專誠走去學Pole Dance，更笑言當年由於同時拍攝《虛擬》及《奪命提示》，故一度迷失於增肥及減肥之間，相當搞笑。娜姐稱：「因為Pole Dance角色要弗之餘，塊面唔可以瘦，因為個角色應該係要靚嘅，但《奪命》個角色又要好殘喎，當時真係好掙扎點兼顧兩個角色。」娜姐續指亦因兩個角色「撞到應」，故在《虛擬》中是戴假髮上陣。

楊卓娜為角色苦學Pole Dance，果然是專業演員。

拍此劇時同時撞上拍《奪命提示》，為了分別角色，楊卓娜特意戴假髮上陣。

劇集以王敏奕與朱敏瀚之間疑幻似真的浪漫愛情為賣點。