美股尚未天朗氣清 邊類股能克服人禍｜晉佳

近日美國政府態度急轉、重歸理性，市場一連兩日反彈，投資者亦重新冷靜過來。不過，重新冷靜過來唔代表一切好轉，投資者需要知道關稅幅度多少？對美國以至全球經濟影響有幾大？事情要拖幾耐？仍然係非常複雜而未有答案，聯儲局有冇能力今年內減息亦很成疑問，一時三刻好難因為特朗普態度軟化而令美股升勢變得平坦。

事件越拖對美股越不利

時間流逝會令更多事情明朗化，最關鍵嘅問題係，當關稅戰明朗化之後，市場預期美國經濟持續增長定係衰退？定係到時仲未睇清增長或衰退劇本。要判斷嘅時間越長，對美股、美元偏向不利，所以，美國政府都會想快快趣趣將事情落實。

連市場大神都唔識計數，就只有兩種操作，第一，好消息反映哂就沽、壞消息反映哂就買，要睇美股嘅中線動力不難，保持硬淨嘅話，納斯達克100指數就不能大幅跌穿周一好消息前低位嘅17592點；第二，避開關稅戰受影響股份，買入少受關稅戰影響、仍持續盈利增長嘅股份。

Palantir仍值得吸納持有

假若有一日，關稅戰明朗化、市場定性美國經濟持續增長，美股將會再破頂，而少受關稅戰影響、仍持續盈利增長嘅股份，就會遠遠高於前頂。所以，值博率仍然存在。就算出現短期衰退，呢類股份表現都未必差。

其中一隻係Palantir（PLTR），股價喺歷史高位125美元時，受累美國5年削減三成國務開支後而急挫，不過最近股價喺5月5日業績之前，已經接近收復跌市黃金比率0.618倍。假如業績理想，股價進一步上升，長線重拾強勢，就能夠持續跑贏大市。再講，美國國防部要縮成本，反而需要AI提升效率，對PLTR或許有利，所以PLTR目前仍然值得吸納持有，至少AI概念夠長遠夠強大，總能夠捱過目前嘅不利市況。

晉佳

https://www.patreon.com/user?u=28525578

相關文章：美關稅戰終極目的是甚麼？ 投資恐遇漫長波動市｜晉佳