【曾智華專欄】水乾加速籃球博彩

公共事務落決定前，好多時要「走過場」。即明明早有決定及結果，但仍要扮嚇嘢經「程序公義」，畀人覺得絕非黑箱作業。

最明顯，香港的大學搵校長，又或半公營機構請總裁，一定美其名全球招聘，實質呢，邊有得爆冷吖，只益曬獵頭公司賺大錢矣。

又例如某啲公共政策，擺明會去馬，但整色整水，也要扮做「公共諮詢」（真正重要的，政府睬你都儍）。然後，再交立法會畀大群「由治入興」議員舉手通過，走完程序後就大功告成，舒服曬。

最新必定如此做的，正是籃球博彩，諮詢時加多「規範化」三個字，畀人覺得有規有矩，唔會亂來，現正進行一個月公眾諮詢。這類諮詢，當然要大家扮演不同角色。大部分人支持（有得唔通過咩？），小部分人扮演「道德重整會」代表，堅決反對，力指會助長賭風。

講到助長賭風，小弟認為極度搞笑，因香港由零開始，就是一個「賭城」，只不過美其名叫「國際金融中心」。事實上，不分職業，不分年齡，不分國籍的幾百萬「投資者」，日日在此大賭特賭股票、期貨、虛幣……當然，明刀明槍的正是賽馬及足球。

你可知香港有幾多收益來自「國際金融賭博」？助長賭風，根本由政府帶頭，不停推動，否則，國際金融中心地位不保的話，就壞國家大事㗎喇。如今政府乾塘，再加特朗普狂發癲，為保政府收入，必須處處開拓，增加收入來源，提早通過籃球博彩，就等於提早一年收多十幾億元，唔該咋咋臨啦。

明日一班千四米，伍廄出三隻，卜定潘頓騎「神虎龍駒」及艾兆禮騎「飛鷹翱翔」。兩皆早見盡，最宜買對碰W，再補抽得好檔的「飛鷹翱翔」大P。