【曾智華專欄】「搞笑特」恐嚇債主

特朗普上台四個月，已令世界多姿多彩，新聞好睇到震，因日日睇佢點發癲。

小弟不似身邊人，一提起特朗普就咬牙切齒，希望佢快啲死咁款。儍啦，佢死就萬斯上，萬斯乃目中無人無禮兇狠之輩，肯定世界更快爆炸。還是睇狂特日日「獻醜」好玩得多。

更好玩在，無論狂特對美國、對世界作出幾大破壞，點樣將美國本來強調的廉潔、正義、光明、民主、自由、法治、包容、制衡、扶弱……優良傳統連根拔也好，但總有「特朗普放屁也是香」的盲目狂迷出嚟解畫，最喜歡指佢在「捉一盤大棋」。

小弟一聽就噴飯，立即前美國總統列根上身：「唔該你用一張A4紙清楚解釋，咪搞到懶複雜高深，最好連牛頭角順嫂都明。」

銀行及財務機構日日忠告貸款者：「借錢梗要還，還得到先好借！」呢兩句正是順嫂都明的口號。不過，癲佬特就似乎唔多明，不單唔明，仲反客為主，身為全球最大債仔，一上場就恐嚇債主。老友，若咁都得，仲成世界？

最冇志氣為日本仔，身為最大債主，被債仔恰時，不單低聲下氣，其代表性報章《The Japan Times》，報道特朗普延遲九十日加關稅，竟大字標題：Tokyo Cheers！你話你係咪黐咗線？債仔玩遲你九十日，你竟歡呼？真係唔玩殘你就唔係美國佬啦。

形勢發展至今，好明顯，只得中美兩個主角在台上玩「鬥大」，各自在摸對方的底牌，各自設立底線，真是精彩刺激。

中國行Top Down制度，官員勝在紀律嚴明。但美國則內部充滿尖銳矛盾，要令民主黨及被搞到雞毛鴨血的商界口服心服，絕冇可能。時間一日一日拖落去，最終邊個先頂唔順呢？