【曾智華專欄】請局長跟我行「青雲路」

長他人志氣，滅自己威風，在傳統上，乃不應該做的事。尤其當屬針對政府時，以今天眼光看，就有點「政治不正確」了。

但我素來的堅持，由一個人、一間公司、一個城市到一個國家，若只日日學「癲佬」特朗普咁，不停大嗌：「我最偉大，叻，我至叻，我要餐餐做阿Head……」咁，不單自己呃自己，更是故步自封。再者，唔識欣賞別人，吸取長處，又點進步？

如今全球大致分成兩派，一派為MAGA（Make America Great Again）狂迷，已唔講理到連特朗普個屁都話香。另一派當然睇你美國佬點死，選個狂人出嚟，對外搞亂世界，對內撼頭埋牆。大家都冇水晶球，且看事態發展。

今日點解我話要「長他人志氣，滅自己威風」呢？香港人絕大部分已有機會旅遊、移民，又或被派外地工作，對國際大城市的崛起及成功，有一定掌握。

單講催谷城市消費與氣氛，本來香港好勁，草根的有女人街及廟街（如今已Out爆），吸引國際靚人的則有銅鑼灣、蘭桂坊及尖沙咀，曾幾何時遊客如鯽，本地人也視為蒲點。不過……一切俱往矣，點解？知都好難講。

結果，政府出盡飲奶力谷的「繽紛」，又被窒老鬼套，批評者是否太挑剔？

唔使辯論，只要大家有機會走一轉深圳、廈門以至貴陽的最新年輕人蒲點，就知本城的「繽紛」何其落後，唔見得人。

昨晚逛貴陽市青雲路步行街，不久前特首李家超也到過，大讚。但點解回港後，完全無法責承各局長急起直追呢？小弟自願帶團，請全部局長去走一次再交功課——我看青雲路成功之因，究竟點解香港做不到？