【曾智華專欄】卡尼Sure Win

過去幾年每逢同輩食飯，大家都問同一個問題：移唔移民？點解有此一問，大家心照，毋須細表，你估「流落異鄉」好過癮？

發覺至今要走的已走得七七八八，上咗年紀的，絕大部分選擇留下，因大家體內奔流的「香港血」，遠濃於外地的「洋水」。傾傾嚇，原來我輩七十歲左右一群，十之八九早早移過民，八成曾居於加拿大。有的1982年中英談判時去，有的1989年內地大型政治運動時去，有的1997年交接時去……不一而足。

一眾迴流者，身份各有不同，有的早是加拿大人，有的則咪搞我，將個移民身份畀返加拿大政府。不過，個個仍有不少親朋戚友在加國，故對當地情況，怎也有一點點關心。例如見到靚仔前總理杜魯多的不濟，也會咬牙切齒，恨鐵不成鋼。最高峰當然是杜魯多被狂特公開侮辱，半講笑、半認真話要將加拿大收歸美國，成第五十一個州時，不懂如何回應，毫無大將之風，有失國體，怎不被加拿大人唾棄？連轉回中國籍的「前加人」也憎到佢飛起。

杜魯多衰曬，在野保守黨當然以為執到——仲唔輪到我上台？其黨魁波利埃夫諗住坐定粒六。點知本來各走極端的加拿大人，在杜魯多軟弱表現「喪權辱國」下，突變敵愾同仇，槍口一致先對外，將基本民生問題（本是保守黨競選綱領）先放下。

優先做乜？首要搵個硬淨領袖同特朗普鍊過，以免被恰到上心口！

執政自由黨本來走過場的領袖卡尼，多次公開演說，皆令人眼前一亮，擺明車馬與狂特一戰，揚言直到「美國展現應有的尊重」。

就此閃電得到不少加人的心，視佢為英雄。佢亦極醒食住個勢提早大選，怎不Sure Win？