【曾智華專欄】超級美味穿透銀幕

坊間經常有種自嘲說法——睇咗當食咗。

當然，這根本是荒謬亂噏。食的感覺，先由味蕾吸收，然後升上神經中樞，再反彈全身，令細胞起舞，點可以靠對眼完成這過程㗎，儍的嗎？

但終於，須承認我錯，終體會到一次，原來真是可以的。剛剛睇完《摘星廚神．巴黎夢》，正正神奇地有此體驗。

《摘星廚神》乃收視爆燈的日本TBS王牌電視劇，千呼萬喚下，終於推出電影版，當然不會細眉細眼只困在日本玩。木村拓哉飾演的米芝蓮二級名廚，周身火，決心挑戰法國三星，遂與拍檔鈴木京香膽粗粗殺到巴黎追夢。

劇本相當平鋪直敘，開場已知結尾，最後木村當然成功，問題在過程經歷幾多橫風雷暴，去到幾乎崩潰面臨放棄才能翻身。

此片最耀眼的女角並非鈴木京香，而是扮演串到飛起、腌尖到爆又冷艷高傲食評家的日本籍模特兒富永愛。我未聽過佢個名，睇完戲速速起底。果然厲害，天生完美身形，鍊低不少歐洲名模，憑其冷艷型格獨特氣質，早在歐洲時裝界如彗星般出現，所有高級時裝品牌爭相搶用，也是頂尖潮流雜誌常用的封面人物。

《摘星》導演也高手，將劇情步步推進到最後半小時，呈現高潮，描述木村這位孤傲廚神在巴黎落難，慘到要下跪求留下機會。

終於點？你入場啦！尤其深愛美食的嚵嘴族，以及有心有火望上進的餐館管理人及廚師，不可不看。睇完，一定可以升呢！

小弟最神往為木村臣服所有食評人奪三星的一餐。冇誇張，簡直色香味由銀幕穿透而出，再加上富永愛這尖端食評人的描述，離場時，真覺享受了大頓人生難得的盛宴。