【曾智華專欄】咁都得？唔係啩？

一石擊起千重浪，好多時塊石未必「堅」，反而係「流」的，但局面咁鬼沉悶，有人擲石，又有傳媒搞大嚟講，自然會起鬨。

前日早上，官界、政界、傳媒界及馬圈奔走相告，互相傳閱一段報道——馬會遴選委員倡分拆足球轉博彩上市。

內容提及遴選委員任永賢突然指基於政府財赤，忽發奇想，度出條「好橋」，正是建議將馬會的足智彩分拆上市，話應該立即可以套現幾百億元，更揚言已將建議交港澳辦研究。

嘩嘩，講到咁有突破性，當然議論紛紛，究竟有冇下文？會唔會實現呢？

呢段消息報道煲到咁大，小弟當然有興趣，立即問問幾位政府及馬會前高層，也包括現任的遴選委員，究竟點睇？一致答案：「亂鬼咁噏！馬會都唔係政府一部分，點可以利用分拆足智彩上市解決財赤呀？有冇常識㗎？」

事實馬會乃「私人會所」，由政府發牌獨家舉辦賽馬，透過投注抽博彩稅。開足智彩也如是，由頭到尾馬會皆非政府一部分，而是「私人」的，政府豈可以話冇錢就「強佔」私人財產？對，政府可以加博彩稅，甚至可以發牌畀外間團體，搞多一個馬會牛會豬會……增加博彩稅，但就是不可以將私有財產據為己有。所以個個認為任永賢提議乃天馬行空，儍儍哋。

最好笑為「叻佬T」：「其實最快捷方便妥當立即見效方法，為活化荒廢的香港大球場，改成全天候賭博繽紛中心，開牌九、番攤、魚蝦蟹……懷舊特色又賺硬。」

人人亂噏完，當然回復理智，齊齊度今晚買乜？「馬王F」大大聲話：「一於捧『黃寶泥』三隻：『艾莉奧』、『超悅名駒』及『錶之多多』。」

小弟直覺，田雞起筷，且看準唔準。