【曾智華專欄】抵拉

本周初開始，相信凡有手機者，必定收到各方老友N條短訊提醒——警方嚴打交通違例！雖然坊間「多口族」反應是：庫房絕對空虛，政府等錢使吖嘛！係真唔係真？肯定冇高官會企出嚟澄清。

但鐵一般事實為今年頭一季，已有N咁多交通意外，其中奪命的有二十一宗，當中引致二十三人死亡，比去年同期爆升四成。

咁情況，若警方再唔「做嘢」，實在講唔通。故此，正路當然是加強教育及宣傳，另一方面，必定會即時有效的，當然是嚴打，一於重罰！

整個行動早早通天，話明在全港進行不定時、不定點嚴厲執法行動，針對不小心駕駛、超速、衝燈及行人亂過馬路。

事實，小弟每日在道路行駛，發覺大量市民不理交通燈號，胡亂過馬路，又或明明附近有斑馬線、天橋或行人輔助線，刻意唔用，貪方便亂衝出馬路，最弊不少為行動遲緩長者，而經常被撞的正是高齡人士。

另外，必須肅清的為近年的「外賣亡命族」，為爭分奪秒，冒險在車縫中或穿插，或爬頭，或衝燈，不時為守規則的駕駛者帶來險象，因班友多數膽正命平。更甚，係人都知不少外賣單車其實是電動的，車速甚快。事實，我曾目睹幾次外賣單車意外，全皆在衝燈掟彎時炒大鑊。

前日本報新聞版大大段報道警方今次行動，出埋便衣，絕對嚟真，大家咪博！最離譜，藝人周永恆在此非常時期，仍踏着「風火輪」四圍片，點會唔斷正？奇在佢被捕後猛掙扎，大嗌「救命」，搞到警員必須使用武力制服，鎖上手扣，帶返天水圍警署，再作跟進調查。

大家記住呀，犯法就是犯法，在馬路上橫衝直撞累己累人，若如此，絕對抵拉㗎！