【曾智華專欄】民調公信力的真與假

立法會換屆選舉年底舉行，各路人馬紛紛摩拳擦掌鋪路爭櫈仔，故此未來半年會好戲連場，或明爭，或陰鬥，為權力，可能乜嘢核突招數都會使得出㗎。我會當戲咁睇，間中又會扮演「政治評論員」，到底接觸香港各級選舉，已凡四十年，好多明謀陰謀，見慣見熟也。

雖然如今香港已經「由治入興」，全部自己人圍內，統一鼻孔出氣，應該會協商嘅，就算自己自私唔做，背後「大勢力」都會做啦。

儍儍哋嘅，其實背後「大勢力」早已對今屆個別議員表現非常不滿，早早放風要換馬，咁即係有位空出畀各路「自己人英雄」爭奪，勢必打崩頭，將會好刺激㗎。

例如，民主思路突然失驚無神拋個民意調查出嚟，話「結果」發現近半數受訪市民不滿立法會表現，僅有三成表示滿意。

小弟一睇，幾乎噴飯。點解？大佬呀，民主思路做調查，話市民唔滿意現屆立法會表現，即有如早年民建聯與民主黨打生打死，各自做民調，真真唔使問阿貴，出嚟結果當然有利自己，打殘對方啦。

難道民建聯調查會「發覺」民主黨做得好咁戇居咩，當然，倒轉亦唔會發生。

好嘞，如今民主思路擺明想下屆再進軍立法會，假若佢哋做的民調，話市民非常滿意現屆所有議員表現，咁仲使鬼佢哋咩。理所當然，民調結果力踩現屆議員表現未符市民期望，正路。但民主思路召集人湯家驊又未免太過「明刀明槍」，竟公布民調後，透露黨內有多位成員有意參選，咁咪即係露出馬腳囉。

小弟讀大學時，也讀過民調研究。總之，無論結果點，第一要睇邊個畀錢做，第二要睇調查問題點草擬，以上兩點可全面「操控結果」㗎。