【曾智華專欄】散場，冇人願離座

邊套片有這般大魔力，散場仍冇觀眾願離座？正是《淺淺歲月》。點解大家唔走？建議你入場感受一下，我只可透露，當時配樂正播出關正傑經典名曲《雪中情》。播《雪中情》，有乜吸引力？這個當然要配合當時劇中畫面，以及散發出來攝住觀眾的磁力。

從來未看過葉童的電影。過去多年，只感覺佢屬「紙上明星」，不時見娛樂雜誌報道佢與丈夫陳國熹出現各種社交宴會及風騷場合，衣着好型好入時，具名牌模特兒風範。故此，今次在《淺淺》中突然見到佢影后級的演技，有點大開眼界感覺。速速翻查資料，哎呀，我錯曬！原來佢1984年及1992年已兩奪影后銜！

此片葉童由頭帶到尾，戲內扮相與在娛樂雜誌中所見形象，完完全全兩碼子事。尤其開場，只是一個老老套套平凡家庭中的人妻，因丈夫有外遇，故此經常情緒不穩，帶點憤怒。

佢與老公謝君豪，本屬青梅竹馬，由同學仔發展到情侶再變夫妻，育有一對子女。

上世紀八十、九十年代開始，中國經濟起飛，謝君豪為尋求更大發展，隻身北上營商。也同樣一如不少男性，不久就「中招」，有了阿二，並誕下兒子，弄至最終離婚。

以上情節在香港，千千萬萬真實例子，但點解睇到觀眾屁股似被黐在椅上，唔想起身走？正是編劇高招。據聞（應該是真的）此乃真人真事，講一對離婚夫婦如何在最患難時，重新燃起愛火……

葉童的演出真正令人喝采，單為佢，大家已應火速入場，何況更有演戲永遠上曬身的謝君豪？很難明白為乜葉童冇被提名競逐今屆香港電影金像獎。此片美中不足之處為資源可能極度不足，故畫面所見，攝影燈光略嫌粗疏，但瑕不掩瑜。