【曾智華專欄】全場齊變虐待狂

未講電影，先講戲名《無痛俠》（《Novocaine》），《無痛俠》是形容一個人物，但Novocaine呢，並非甚麼人，而是一種藥物，中譯奴佛卡因，強烈鎮痛劑，多數用於牙科手術中。

若果二十年前識呢種藥，我就不用經歷十級痛苦了。當年睇政府牙醫，年輕醫生話：「曾先生，你有蛀牙，要先磨大個窿再補，你頂唔頂得住痛？（佢冇話劇痛呀！）因有啲病人對麻醉藥有不良反應，故寧願忍痛。」「……咁我忍啦！」心諗，人哋忍得，我都忍得啫，使死咩！

就此一句我忍啦，立時大大鑊！醫生開動電鑽向牙窿猛鑽，請幻想嚇，一隻牙滿布神經線，就算洗牙都赤到飛起，何況成隻鑽開，唉……總之慘無人道，寧願當場死去！自此，任何手術，唔使問，一定麻醉。

講返《無痛俠》，正是描述一個怕羞仔Nathan患上「先天性無痛無汗症」，無痛的感覺，連身體被斬傷灼傷甚至骨折都冇感覺，更弊，連急尿都唔知，故此，相當自閉。

如此怪怪的一個銀行助理經理，竟被新來的甜姐兒Sherry睇上，火速成為愛侶。某日發生劫案，甜姐兒被綁架，於是，怕羞仔被逼大男人上身，拚死營救。

一個平時溫溫文文又怕事的小子，點與幾名窮兇極惡悍匪周旋呢？

此片頭三分一為要建立Nathan及Sherry的感情，拍得風趣浪漫。

但劇峰一轉，到Nathan無痛俠上身，誓死與綁匪拼一死命時，靠乜？真真變咗膽正命平，無論被打被插被撞……以至滾油炸手，一一因無劇痛感覺而頂住。幕幕睇到觀眾肉緊標汗。不過，似乎全場一面驚呼一面享受，變曬虐待狂也。