【曾智華專欄】病人的「震撼帳單」

消委會早前發表報告，指私營醫療機構的收費，透明度仍然不足，建議政府「做嘢」，意即再唔監管唔掂。等我補多兩句啦，其實如今私營醫療加保險集團有意無意的聯合「掠水大行動」，已變計時炸彈！

私營醫療收費，素來是個黑洞，病人入院前，根本無從估計「失血情況」。但醫院為保障自己，若你冇保險，幾大先收「未來錢」。而這筆「未來錢」，必須多到院方肯定足夠支付未來的費用，否則，就會要求你預支再預支。

N年前先父入院治療，起初不想霸佔公用醫療資源，覺得咬咬牙也可能負擔得起，決定入住私家醫院。此乃佢第一次，也是最後一次。小弟每隔幾日找數，嚇到標冷汗，正正有如今日標題的「震撼帳單」，不單止超勁肉赤（當年冇醫保），兼且畀畀吓真的開始擔心破產，唯有硬着頭皮向醫生表白。

私家醫生倒也慣咗面對呢種病人畀到乾塘現象，咁點？一二三Call白車，轉公家醫院，結果送咗去廣華醫院，住到離世。

如今到我呢代，為免要在公家醫院瞓冷巷，又或有要求時叫天不應、叫地不聞（真實慘況），惟有買個人醫保。不過，又發覺這也是個無底深潭。我買咗四年，一個仙未Claim過（但願一世如此），但保險公司可以不用再諮詢我，就年年隨意加價，加幅恍如任定（亂嚟），然後自動過數。

我絕對知保險是玩集體「資金池」，邊個需要邊個攞，唔夠就係大圍事，又再加價。

但條氣唔順，正是現今仍冇官方監管私營服務亂收費。尤其個別醫生一旦知道病人有保險，立時大刀斬落。呢個情況，若冇公開公平方式去規管，遲早會爆煲，只是未知點爆法。