【曾智華專欄】逆流遊台北大享受

早早講過，我是逆流大叔。凡人多地方的，例不會去。放長假時，香港人個個雞飛狗走返「真假鄉下」，小弟此時例必留在香港，享受少有的寧靜——交通唔擠塞，公共交通冇乜人，泊車及食嘢搵位易，嗰種舒泰感，平日何處可尋？相反，當人人開工搏殺時，咁就玩倒轉，喂，你唔去，咁就到我周圍飛喇。

最喜歡到珠海兩日一夜美食遊，專揀周三中午去。點解？可能跑夜馬啩？中港城碼頭立時恍如疫情再發生，杳無人跡，坐船過珠海，好似一個人包完碼頭再包全船，呢種享受，簡直大富豪級，超乎想像。

去台北又如何？上周日體驗，嘩，乜遊台北可以咁從容嘅咩？

香港台北航線，人人知乃黃金線，不同公司加埋一日有N咁多航班。如此安排，當然是跟足市場需求。係呀，香港飛台北航班經常滿㗎，但全集中在周末及長假。大量香港人周五湧去台北，然後，周日又湧返香港，翌日要開工搏殺也。既然掌握呢個Pattern，我呢位逆流大叔當然調轉嚟玩。上周日正正訂咗上午十一時十五分機，坐長榮航空赴台北。講都冇人信，成班機五分一人都冇，真真開心死，因一個人坐晒成行三個位，咁鬼舒服，真係再飛多十五個鐘去加拿大都唔覺辛苦。航機升空後，空姐可施施然慢慢派餐收餐，一切都在悠悠閒閒氣氛下進行。

抵埗台北，步出機場，過關竟然沒有人龍，我是「台灣熟客」，故此可行特快通道，第一次見零人排隊，好似發夢咁，幾分鐘就攞埋行李，大踏步經海關走出接機大堂，慢慢研究去邊度換台幣。

大量的士在等客，輕輕鬆鬆搞掂平日煩到抽筋程序，逆流旅遊（甚至人生），真大樂趣。