【曾智華專欄】唔該你申請啦

邊個唔該邊個？有乜嘢要申請？

真真世界輪流轉，香港過去一百年，有兩個身份，絕對吊起嚟賣，只怕人人嚟真打崩頭，從來唔驚冇人吼。係乜？正是馬主及馬會會員！最「非常時期」，聽講「枱底價」是天文數字，當然此乃犯法，早有人因此去咗赤柱踎。

不過，時移世易，近幾年香港不少有錢佬變咗「冇錢佬」，好唔掂，個別曾經是大馬主。

另外，十萬計香港「台柱」式專業壯年移咗民，呢班本來全屬馬會會員生力軍。

要馬照跑，單靠草根賭仔當然唔掂，一定要有馬。馬的身價如今百幾萬元到千幾萬元，有幾多香港人買得起，再花八萬、九萬元一個月去養馬呢？馬會規定只有會員才可競投養馬權，連鎖影響下去，若馬會唔夠會員，就唔夠人做馬主，咁落去，分分鐘唔夠馬跑，點搞？

拆解方法：一、放寬會員限制。以前申請做會員，必須從遴選委員方面攞到張矜貴申請表，經幾個全費會員推薦加面試，過五關斬六將，再付大筆費用，才可入會。

馬會當然唔想搞Cheap晒會員形象，最新辦法，「精選」資深又紀錄良好全費會員，邀請佢哋提名子女入會，不需再向遴選委員「求」申請表。如此，好快可吸納千計新會員。

二、新會員增多同時，放寬每個人及每個組別養馬數量，鼓勵多啲人夾份過馬主癮。

以上兩招，在以前吊起嚟賣的日子，絕不可能出現，意即如今情況相當水深火熱！

今晚第七場三班千二米，「綫路盈樂」牌面高晒，不過，我喜歡「佛亮老撾」。上仗跑第二輸個幾位，睇佢入直路種鬥心非比尋常，雖被前馬頂住，但竟會在馬叢中自動側頭，提騎師換線衝刺，不簡單。今晚投一票W、P！