【曾智華專欄】荷里活電影的良知

「影癡」過去兩個月必定大樂，因有多套奧斯卡級數作品輪流上畫，套套高手出招，目不暇給，眼睛腦袋齊齊上雲霄。

昨天入場看《粗獷派建築師》，前日看《搖滾詩人：未知的傳奇》及再早期看《阿諾拉》，皆有少少觸動，因三套片皆影射美國文化。

觀眾見到的製作人價值觀，與現今掌權主流人物特朗普，以至佢身邊一眾惡形惡相政客大大不同。狂特猛吹要美國「偉大」，恍如做黑社會大佬，四圍恰人，擺出個霸王款亂加關稅就是「偉大」，這種「偉大」，完全冇良知、冇良心、冇道義、冇公義，更是出賣盟友唔使本。

幸而美國暫仍有自由（狂特咁玩法，可能慢慢窒息所有對頭人，創建「獨裁新美國」），故此，荷里活的知識分子，仍會拍出唱反調劇種，將美國夢虛偽糜爛腐敗的一面揭開。

不少人問，點解《阿諾拉》這套小本製作會成為最佳電影？簡單，因評審睇到《阿諾拉》背後的含意，用情色畫面及跳躍手法，揭露及刺破主要由白人富豪及權力階層合作包裝出來的美國夢。狂特經常咆哮別人運毒入美國，事實卻是美國從來是個癮君子社會，由上至總統政客富豪，下至街邊流浪地痞，皆道友如麻，對毒品需求甚大，才會有四方八面的供應。

另外，《粗獷派建築師》也同樣描述美國雖號稱自由民主友愛和平，實質處處歧視欺詐，掌權人（政客富豪黑社會）將外地人及草根階層高壓剝削。更甚，外來的人縱有超脫才華，也會被白人用一層又一層的「玻璃天花板」封死，無法上升。

睇完艾哲倫保迪這位匈牙利天才建築師去到美國的遭遇，再睇睇狂特日日口出狂言歌頌美國，真的胃部作悶。