【曾智華專欄】冇癮到爆的經驗

啟德體育園3月1日在一片爭議聲中開幕（官方企硬唔直播開幕禮，民間尤其傳媒界力指決定過時無理），跟住要睇究竟能否財政獨立、收支平衡了。

通常一項大型建設由零開始規劃，都會懷着美好願望，不過，現實歸現實，願望不一定會成真的呀！故此，當睇到報章大字標題「出租包廂可成體育園收入支柱」時，我腦內即時浮現起當年香港大球場改建前的美夢，以及落成後的碎片化。

當年香港大球場動用十億元（八億元馬會援助）改建，正是「夢想」落成後盛事連連，除足球、欖球外，最重要是巨星排隊開演唱會。

既然「將會」有如此多盛事，而座位又有四萬個，立即引來國際大型餐飲商投下天文數字巨資，在旁開設餐廳，令客人可以邊食邊欣賞高質素演出，如此，理應勢必豬籠入水。

另外大球場也有多個包廂，供各大商業集團競投，作為貴賓廂，招呼大客入場享受美食與演出，從而建立良好關係，之後，生意合作自必水到渠成。當時小弟曾光顧球場旁邊美式餐館，入洗手間時大開眼界，因每個尿兜皆堆滿冰粒，小便時，大有「將冰山射開」的快感。

結果，大球場開幕係威係勢，跟住慘情，歌星開演唱會時，慘被四周非富則貴的半山住客排隊投訴，搞到本應勁度沖天的音樂會，變細細聲音樂會，由歌星到歌迷都冇癮到爆。大佬，咁點唱落去呀？加上香港足球也變一潭死水，根本沒甚麼可谷爆球場的大賽，剩下只有一年一度欖球賽，點養得起巨型餐廳及天價包廂？就算貴賓願意被邀入場，但又有乜好睇？

一切就在冇癮到爆之後陰乾，或執笠，或蝕到攤攤腰，但願啟德園勿重蹈覆轍。