專欄 蘇哈仔｜英超升班馬命途多舛

修咸頓9分，李斯特城和葉士域治17分，狼隊就22分，其他球隊已經走甩。不過以人腳和表現來看，除非前3隊突然有脫胎換骨的演出，狼隊又「發波瘟」，否則大有可能連續兩季3支升班馬做升降機。大家會問這會成為常態嗎？可以說機會不低。

3隊去到11、12輪左右，已經在榜尾浮沉，他們大可在冬季轉會窗增兵博一博，但結果李斯特城只花300萬鎊簽下右閘古尼巴利；修咸頓簽入3人，全是年輕小將，只有免費的巴西左閘威靈頓有出場機會；葉士域治算是最大手筆，用了2,200萬鎊簽了年輕前鋒菲路真尼和門將阿歷斯彭馬。

以往的護級分子為求一搏，哪怕是升班馬，照樣在冬窗花幾千萬鎊買10名、8名球員爭護級，但如今受制於英超的盈利和可持續發展條例（PSR），恐慌性收購有短期作用，但未必可以長期有用，就算博到護級但球員唔啱踢，當3年後轉會費要計入條例中，到時賣人蝕錢唔夠填補，唯一做法就是將陣中其他有價值的球員放走，以通過條例上限。

李城當年奪冠後，瘋狂投資買人但眼光差，結果之後要將陣中有戰鬥力的球員賣走，導致降班收場；紐卡素和愛華頓都在PSR下過得苦不堪言。升班馬本身已經實力不足，怕觸及PSR又唔敢亂買人，怕之後要承受惡果，造成升降機的循環！蘇偉業