體操｜石偉雄宣布退役 香港「體操王子」結束26年運動員生涯
石偉雄宣布退役！香港「體操王子」石偉雄曾經在2014及2018兩屆亞運贏得跳馬金牌，並且三度參加奧運會，包括2012倫敦奧運、2021東京奧運及2024巴黎奧運，是香港體操史上最成功的運動員。今日（28日）他正式宣布，結束26年運動員生涯。
石偉雄：26年體操生涯充滿高低起跌
33歲的石偉雄，今日在社交網站發文，表示「過去26年體操生涯有甜酸苦辣，充滿高低起跌」，他從每次低谷中學習與低潮、傷患共存，令自己成長。他在文中多謝教練Sergiy Agafontsev，陪伴他走過20多年旅程，以及家人的支持和體諒，還有體院員工及體記。
石偉雄早於6歲學習體操，9歲入港隊受訓。為了參加去年舉行的巴黎奧運，他在爭奪資格期間多次打止痛針醫治傷患，一度有斷腳風險。然而，這位香港「體操王子」為了代表港隊比賽義無反顧，最終完成巴黎奧運之旅。巴黎奧運之後，石仔休養生息，再沒有參加比賽，同時花時間指導師弟妹。今次石仔正式退役，未來是否轉型教練抑或再有新發展，留待情況明朗化後才對外公布。
相關報道：體操｜石偉雄寄語年青選手珍惜資源 力保體院「精英A 級」地位不變
記者 吳家祺
石偉雄退役聲明全文：
大家好，終於嚟到呢一日，過去每年呢一個月份都會見到唔同運動員回顧自己嘅運動員生涯，今日終於到我同大家宣布，我正式退役了。
過去26年嘅體操生涯既有甜酸苦辣，亦充滿高低起跌；26年嚟體操帶比我好多榮譽，包括兩屆亞運冠軍，2次世界盃冠軍，同時令我遍體鱗傷，但體操帶我從每次低谷中學習點樣與低潮、傷患共存中學習，令自己每日成長，成為今時今日嘅石偉雄。
好多謝我既教練兼總教練 Sergiy Agafontsev 陪伴我呢20幾年既旅程，好多謝屋企人無私嘅支持同體諒，好多謝我既人生Mentor Dr.Lee，多謝體院同總會嘅栽培，好多謝我經理人Faye幫我打點一切，多謝一班勞苦功高嘅醫生同治療師，多謝體院一班上上下下既員工同同事，多謝一班體記朋友，好多謝咁多贊助商投資喺我身上，仲有好多好多人要多謝，抱歉未能逐一答謝。
由奧運後休養呢段時間發生好多事，亦都諗咗好多嘢，有啲係意料之內，有啲係意料之外；又好似做左好多嘢，又好似冇做過啲咩就過咗半年多；有啲嘢以為自己估到，又有啲嘢並唔係自己預計咁理想。
踏入社會，可能在任何崗位上都會有人鍾意你，或者唔鍾意你，無論點都好，喺呢一刻我覺得最重要係同自己交代，知道自己想點先係最重要。
體操教識咗我好多嘢，如果問我會唔會唔捨得，相信係一定會，因為體操喺我生命中好重要嘅一塊版圖，如果問我會唔會再揀多次，我答幾多次我都會再次選擇體操；如果問我滿意呢26年既經歷呢？我會用體操項目上嘅滿分10分去形容。
做一樣嘢唔難，但長時間堅持或者未必人人可做到，何況長時間堅持一樣又悶又辛苦既動作就更難。不過再難再辛苦都總有佢嘅樂趣，心態決定你成唔成功，但態度可以決定你去到幾高。
好多謝咁多年來，大家都留意體操運動，記得「石偉雄」、「石仔」，多謝你哋比我做過「體操王子」，希望大家繼續支持我同留意體操運動，喺將來既所有範疇上，我都會繼續努力，好快我會再喺唔同嘅崗位上繼續幫助體操運動，同埋同大家見面，多謝。
容我如平時跳馬比賽後，向大家舉手致謝意🙋♂️，我，石偉雄，用26年完成香港運動員呢一「跳」，後會有期。
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
