【曾智華專欄】狂特冇道德冇道義

世界形勢越來越凶險，乜都比美國玩晒，完全欠缺制衡，點掂？如今凡睇新聞，幾乎冇晒其他意見，清一色只報道特朗普講乜，呢丁狂躁佬永遠一時一樣，前言不對後語，但傳媒永遠冇認真質詢佢亂噏邏輯。

尤其橫行霸道，為亂改地圖亂霸領域，任何新聞集團唔跟，就唔畀你上空軍一號，肆意橫行程度，令人髮指，呢個究竟是否一直講文明法治言論自由的美國？點解淪落至此？簡直匪夷所思。

狂特乜都強調美國第一，即其他國家只可第二三四五……對，佢可以發癲，但其他國家為乜要接受？尤其歐盟，自己擁有龐大綜合實力，豈可畀呢條失控總統玩殘？美國明明宣稱與歐洲各國擁抱共同理念，故支持烏克蘭保衛國土。原來大國的承諾乃謊言一片，如今換個癲佬做總統，就可一嘢在俄烏戰爭談判中賣甩歐盟，呼之則來，揮之則去，歐盟若不再「硬起來」對特朗普迎頭痛擊，勢必歷史地位及影響力一鋪清袋！世事講平衡，當一個霸權玩成咁，最終將物極必反，且看怎反而已。

最令人失望為美國佬已變毫無國際禮貌，連基本江湖道義都唔講，狂特肆意侮辱別人，當別人還口佢就暴跳如雷，自己不單變「皇」，更想變「神」，看來終局應是入精神病院。

澤連斯基的確大鑊，一時被美國總統罵獨裁（笑爆嘴，現今講獨裁，邊個勁過狂特？），一時派個特使凱洛格會面，見完又反轉，形容「基仔」係「勇敢領袖」，擺明玩弄股掌之中。

停戰個個都想。但俄烏戰爭，由俄羅斯明侵略開始，到美國推烏克蘭做馬前卒，如今死咗咁多人，美國佬突然變臉，與普京攬頭攬頸而出賣盟友，任何支持佢者，皆全冇血性！