【曾智華專欄】黃總快谷盡「零零亨」

上周三本欄貼士全中，開完「一啖砂糖」後，果然到上周日立即開「一啖Z」，認真鎖你，大家一齊食兩餸飯當晚餐啦。

小弟再三提及，賽馬日直播我甚少睇「官方台」，因太四平八穩，悶到抽筋。賽馬節目也是娛樂節目，必須有點創意、有點好玩才夠吸引。故此我只追睇星島日報集團的《賽馬日在線》，尤以鬼鬼祟祟的「零零亨」最為吸引。

「零零亨」乃馬經版的亨利，最殺食為賽馬日隱身沙圈，探索有乜特別動靜，然後報料。十次有八次令我贏錢，因當佢發覺騎練有家人突然出現，尤其來自外地，又或老婆帶埋BB，就是搏殺信號。例如上兩周霍宏聲老爸霍利時由南非來捧阿仔場；黎昭昇父母新西蘭到訪；韋達阿仔遠道而來……更易睇為當潘頓、賀賢、田泰安……老婆抱埋BB出現，咁就十之八九去馬。

正常賽馬節目，你冇可能睇到上述畫面，不過，《賽馬日在線》就有。一旦「零零亨」發現不尋常人物出現，報出來，多數中。

另外經常中的，為發現騎師仔女友/老婆突然曝光。之前有鍾易禮外籍女友；上周日「零零亨」又發現巫顯東太太尾場出現沙圈，呢場巫仔坐騎「天將龍駒」獨贏賠率二十八倍，位置賠率都七倍幾，大冷。結果，又一箸夾中，僅輸短馬頭，爆出一千三百幾蚊Q。

「零零亨」雖勁，可惜即場報料時出時唔出，間中被黃以文老總點咗去做其他嘢，搞到最殺食的「𥄫料」工作空白一片，實在浪費。若我揸Fit，必將亨仔谷成臥底明星。

今晚捧偶像杜苑欣三隻，佢場場只一心一意去盡（不少騎師三心兩意㗎），包括：「志滿同行」、「建測羣英」及「安都」，全買Win！