【曾智華專欄】周三泥宴「食砂糖」

本欄提供的賽馬貼士，經常一啖砂糖一啖Z。小弟當然希望次次開砂糖，但邊有咁理想吖。

所以，各位，當開Z時，請勿擲番茄、雞蛋，但開砂糖時，也不必當我是馬神，符碌矣。

剛剛周三，十年唔逢一閏，開百分百砂糖。本欄指明第七場只四隻跑，分別為「同祥和順」、「昇瀧駒」、「喜至寶」及「魅力寶駒」。神到四隻包辦頭四名，即二三四重彩、QP、Q、單T及四連環，乜都中晒，嘩，唔係啩？好嘞，周三食完砂糖，明日會否開Z呢？總之，千祈咪過信我的符碌貼士。

潘頓墮馬後，易賭咗好多。例如周三晚擺明田雞開飯，因兩大馬房游廄及希廄分別畀三隻佢騎，當中必有王者興。一睇個局，當然捧佢食騎師王啦。

另外，罕有地方嘉柏場場出馬，陣勢擺開，已宣示連場出擊，果然如此！

明日又如何？英國高手夫婦馬昆及杜苑欣殺到，最大好處，根本不用懷疑兩人鬥志，絕對不會出「軟硬」或「伸縮」鞭。故此，只要坐騎擅途程又檔位唔差，即投一票可也！

明日「問題騎師」梁家俊再上陣，必定場場搏盡去馬，因競賽小組的獨家近鏡會將佢全程監察，絕對唔衰得，想死乎？

第八場二班「鄉議局盃」，俊仔騎「遨遊武士」，乃此程專家，七跑此程，兩W三Q。

上次潘頓大熱一點四倍勝出的「陽光勇士」，今次排九檔，由「哈囉文」執韁，肯定不穩，咪瞓身。

「話你知」改配馬昆，上次何澤堯騎跑第三，今次必須兼顧，馬昆功力高一級也。

「駿跑得」剛剛千二米W，今次突大幅增程，廖康銘必有見地， 信佢專業判斷。

以上四隻，一於飛起「陽光勇士」，改用「九五赤兔」，六十蚊互穿睇跑馬。