【曾智華專欄】走入《籠中》啃五集

新年期間，自我冚旗休息七天，做乜？當然是煲劇集。每套開場睇五分鐘，若渣波，即刻Cut，Next！又再五分鐘下決定。結果都幾弊，平均睇五套都冇一套可繼續。

去到第六套，法國劇集《籠中格鬥王》（《The Cage》），得咗，不單止睇落去，更少有地連啃五集，中途冇停，可知其吸引力。

此乃法國動作勵志片種，劇情都幾老套，也是《洛奇》一類，描述一位來自破碎家庭的年輕人，有沖天壯志望出人頭地，誓要成為最殘酷的比賽——籠中格鬥王者。

當去到拳館時，人人見佢只得一百三十多磅身形，真係得啖笑，盆盆冷水照頭淋。

資深劇迷睇呢個開頭，應該都知結尾，唔使估，純粹睇佢中途幾集捱幾多苦，經歷幾多起起跌跌而登頂點啦，頭尾就千篇一律㗎嘞。

此劇好看，在於主角過程中瓣瓣碰着黑，竟仍然對糜爛生活的母親不離不棄，不斷作出犧牲，咬咬牙捱過千辛萬苦，永不言棄，其堅持感動不少人主動伸出援手幫一把。

試想想，一百三十多磅「奀仔」，點與二百磅的「大猩猩」鎖在籠中作困獸鬥？

就算做戲，你都先要將自己操成擁有爆炸肌肉的「筋骨人」，以及在籠內拳拳到肉，起碼看似真的在打。

老友，今時今日拍埋身搏鬥電影，再好難用科技、替身，甚或就鏡位去取代，一切必須真真正正打到開花。

男主角布默為演好此片，擺明豁出去，打到黐肺，帶血吞拼。劇集的成功，在於所有演員皆全盤投入，誓要一戰登頂，果然掂！立即部署開第二季。

值得一提，片中安排布默到湖光山色的加拿大，以及充滿南美風情的墨西哥地獄式訓練，觀眾看到的，就是幕幕Post Card般的美景。