财爷须出狠招开源节流｜曾智华
财爷波叔即将发表《财政预算案》，你话佢脚头唔好又得，班数功力与前N任差一截又得，总之由佢接替曾俊华开始，“香港夹万”就似生晒锈咁款不停漏水，搞足几年仍在鸡手鸭脚不知点封番个窿，更唔见佢有乜创新思维开拓水源。
无论系点，一年一度功课总要交，真系成身冷汗，点搞呢？其实财政司司长好大权，《基本法》规定佢拥有独立权力，连特首都无法干预。故此政圈皆知，当年梁振英做特首，次次与曾俊华撼到飞起，但CY一直冇阿John符，因后者有晒规章保障独立思考及行事。
财政司司长既然咁大权，当然全人类对佢有期望，要求年年交出新创意新思维，“令香港再次伟大起来”（Make Hong Kong Great Again），而唔系想听你成个“家嫂”咁款，呻自己“巧妇难为无米之炊”。
公职人员应冻薪或减薪
如今，人人等睇佢点开源节流。未讲开源，先讲节流。香港回归后并非第一次穷到㶶，结果点？最快又见效系全港公职人员冻薪或减薪（包括公务员、医管局、社工、教师……凡跟政府薪酬表出粮的全中）。
另外推出肥鸡餐减磅，长期未填的空位，取消或冻结，反正2至3年皆冇人填，“藕”系度等乜？
人同此心，立法会根本唔使咁多议员，下届理应减半再减人工，千祈咪“咨询”佢哋，自身利益攸关，必反对，问都多余！
停止或延迟花上天文数字的庞大工程，香港并非唔够地，只系畀少数人霸晒，当佢哋发觉霸占N年仍无利可图，自会呕返出嚟。
开征旅游税 吸尽博彩税
又等我乱咁提议嚟开源。第一是香港人旅游成瘾，每年几千万人次出出入入，绝对唔会因要畀多一百几十唔出唔入，加呢方面的税，无大肉痛。
第二是政府建筑物，可商营化的尽用，包括卖广告，租部分畀人做生意。
第三是尽吸博彩税，香港从来是个大赌场，炒楼炒股炒期指皆天文数字。唔好扮道德话加多几日赛马或开篮球博彩乃“鼓励赌博”，再讲会引智者发笑。暂时讲住咁多先。
资深传媒人 曾智华
相关文章：
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
