【曾智華專欄】「直線力山」初三開運

大年初三，恭喜發財！

本來近年已甚少「俗氣」恭喜人發財，改為「新年快樂」及「身體健康」，但面對一眾馬迷，到底「捐」咗咁多做善事，新正頭第一擊，發吓財亦人心所欲也。

餘下賽事，已冇咗潘頓破紀錄的焦點，應改而睇睇邊個做冠軍練馬師了。

我當然捧華人。睇鬥志，沈集成簡直有沖天烈燄，肯定死咬唔放，去硬馬。

伍鵬志又如何？馬雖多，但高質素的略略久缺，且旗下馬不停跑，只怕入到直路開始腳軟，不過，三甲不能唔預佢！

姚本輝就快退休，阿仔接硬棒（副練之中，似乎冇乜對手。因馬會選人，講能力，也講外形，姚仔贏晒），所以，未必退休前將馬鍊盡。不過，輝哥實力仍是華人數一數二。

至於上屆冠軍呂健威又如何？會否又重複來一次臨尾殺上短頭勝出？絕對有機會，因以上四位之中，論謀略，佢勝一籌，兼且手上子彈也不少，隨時有需要就揭竿而起。

至於人人話有機會爆上的巫偉傑，我睇今季未得嘞，等多兩季，再成熟啲先啦！

今日有場三級賽，跑千八米。

我睇好姚廄的「直線力山」。呢匹馬曾經在方仔處兩季，勝出兩場級制賽，以長途為主。去到去年年頭攀到一一七分，開始能力止步，結果今季拉倉。

呢類六歲馬，若姚本輝冇一定信心，應該唔會收。收得，必尋求交代。

轉倉後，先跑兩場不合腳法的千六米二級賽，當然輸。上仗改跑一級賽二千米，獨贏賠率六十二倍，根本無心去馬。

不過，今次唔同，改跑三級，實力大增。若然賠率十倍以內，老友，祝大家年初三開運喇！