【曾智華專欄】你聽咗姜濤新歌未？

哈哈哈，哈哈哈，笑死冇命賠。

近日馬友碰口碰面，個個互相調笑，猛問：「你聽咗姜濤新歌未？有冇唱出你心底的真正感覺啊？哈哈哈！」

起初小弟都唔知佢哋噏乜，因從來不是「姜糖」或「姜粉」，只欣賞佢乖乖仔的形象及充滿奮鬥精神，比同輩年輕人略優勝。

既然個個講姜濤新歌，好，立即上網查。不查猶自可，一查真係笑爆嘴，唔怪得班馬迷老友咁「心花怒放」，互相取笑喇。

因姜濤新歌名《白果》，最攞命的兩句，絕對直插馬迷心坎：一、「是我的心魔，怕吃白果」；二、「是我的心魔，愛吃白果」。

兩句字面好矛盾，但這正正發生在大部分爛賭馬迷身上……又怕食白果，但又不停主動個個星期爭住食兩次，唔「愛」又豈會如此？

講馬圈「大吉利是」嘢，另有兩宗，一為馬會設計個鐘比潘頓敲，凡贏一場敲一吓，結果好多人認真又好，多口又好，形容此為馬迷「喪鐘」。因個個追佢破紀錄，弊在紀錄未破前，已輸到瞓街，無他，人人以為「軟硬鞭」真的會不顧一切早日達標。豈料……你話輸咗幾多日呢？

另一單畀馬評人笑甩肺，為安排騎練扮大頭佛。大頭佛在廣東俗語中代表乜，你話呢？難得又有華籍騎練肯扮，咁就要睇睇佢哋扮完之後的蛇年運程喇。

明日我最有興趣研究二班千二米一場，睇牌面，並無一匹特別超班，理論上「華麗再勝」、「人和家興」、「同祥和順」、「魅力寶駒」及「水晶酒杯」皆有機會W，揀邊隻呢？

決定揀「水晶酒杯」，上次爆冷勝出，不少人認為六歲馬，冇得冧莊咾啩？但翻查紀錄，此馬以往狀態好時，多是打孖出擊的，今次可能也如是觀。