【曾智華專欄】1、2、3、4……個跌倒

一年前小弟在本欄寫咗篇《千祈千祈咪跌倒》，主要提醒自己及同輩老友，因全部開始轉字頭，正所謂「奔七」，冇得認叻牙擦，自己知自己事，一切器官慢慢退化，當然包括全身筋骨。如此必影響平衡力，輕輕一鈎就會跌倒。長者最大問題為跌，因骨頭脆化，好似蔡瀾前輩咁，一跌，股頸骨即碎，幾個月唔郁得，直接令健康急劇惡化。

年晚老朋友聚會特別多，有舊同學、舊同業，也有新認識的同齡朋友。哎呀，唔係嘛，點解餐餐飯局，總有一兩個跌倒出事？有額頭縫針、有眼底裂開、有膝蓋骨裂……另一個更勁，在家跌倒（咪以為屋企最安全），向前仆直，口先落地，三隻門牙應聲飛甩，另外第四隻撞到插入牙床！

「快樂傳媒老是佛」因個個百厭星，惟有互相取笑，之後細訴經過。

原來跌倒並不需要被大力撞或踢中巨物，多數只小小一級，唔覺就中招。

此外，就是年紀大眼睛壞，「高佬B」正正連透明玻璃門都睇唔清，一嘢就撞埋去，立時額上「中原一點紅」再噴血，要白車送急症室縫針。

老友輝哥本來從不做運動，如今都逼自己日日跟太極師傅練平衡力及腰馬腿肌，因知道一跌，身體就會返唔到轉頭（太多例子了）。

小弟又如何？當然冇得懶，無論春夏秋冬打風落雨，每日堅持步行及拉筋一小時。天晴時到公眾運動場，天氣差時就鑽入港鐵站，由A出口行到BCDEFG出口，行到微出汗為止，然後搵有欄杆地方踢腿拉筋。

個人經驗，紀律性持續做足一年後，坐骨神經痛會消失，腰馬有力，行路姿態再冇成個阿伯咁款（年前老婆大人經常揶揄）。

各位老友記，冇得懶㗎。