【曾智華專欄】「高度刺激」中睡着了

為支持電影業，加上空閒時間多，故絕大部分上畫的，我皆會睇。反正長者場戲票平又冇乜人，好的，就由頭睇到尾，例如仍在上畫的《破．地獄》、《誤判》、《教宗選戰》、《爸爸》……

遇上渣片，則會中途離場，無謂浪費時間，邊套？唔講喇。

間中也有睇到瞓着，瞓完再睇，睇完又瞓着的，通常是畫面好舒服，配樂好優美，主角好靚，但內容是空洞派。

又有一種，是高度緊張，標榜刺激的，但我仍然可以沉沉大睡，最近的一套《焚城》正是。點解咁大製作都未能令小弟戰勝睡魔？因劇情反駁之處甚多，演員雖落力，但卻多演得不到位（例如莫文蔚的誇張式演繹）。

前日又遇上一套非常「緊張」的內地大製作，入場前睇資料，宣傳重點在「零冷場24億票房賣座系列」、「猛片《消失的她》陳思誠再布『燒腦詭局』」，邊套咁勁？正是《誤殺3》。雖然之前1及2未睇過，好，又入場睇睇有幾「燒腦」先。

結果，可能是我攰（照計冇理由，早上十點），可能是文化口味不同，也可能根本我唔識貨，在「高度緊張」的劇情下，竟十五分鐘就睡着了。

劇情描述富商鄭炳睿寶貝女兒，在眾目睽睽下被綁架失蹤，奸狡的匪徒乃智慧型，用精妙布局逃開警方的天羅地網追捕。

整個布局的開場，本來相當吸引，但劇情發展下去，越來越大話西遊，編劇及導演空有大好橋段，而沒法落實勾住觀眾的細節。結果，就只見富商及警方撲來撲去，智慧型罪犯就一次又一次得手，但拍得毫無章法與邏輯，結果，我十五分鐘後瞓着，醒後勉強再追看，十五分鐘後又瞓着，無法，一小時後決定離場飲茶好了。