專欄 Will知足球｜不敵時代巨輪 戴治功過難定

愛華頓新班主上任後，近5場2和3負，戴治亦好快落鑊，上場足總盃2:0贏彼德堡，就由愛華頓經典雙閘史密斯高文加拜恩斯頂住個教練位。

2023年就係戴治走馬上任，除即幫助愛華頓護級成功，去到第2季球隊被賽會扣分依然頂得住，再一次好早就逃出降班漩渦，去到今季比賽內容大致相同，依然都係護級線之上，不過季中就畀人炒咗。

睇番呢個陣容已經用到盡，神經刀嘅比克福特把守獨木關，右閘仲要用緊39歲嘅艾舒利楊格，前面又係退化緊嘅卡維特利雲，儘管戰術繼續用好多高空波，但係已經將球員嘅特點發揮出嚟。今季嘅收購亦都表現唔錯，買咗伊利文尼戴耶，佢做咗好多突破嘅工作，最深刻當然係對曼城嘅入波，甚至取代埋杜韋麥尼爾打正選。

儘管戴治做嘅嘢就係四平八穩，但睇嚟依一種務實地每季以護級為目標嘅傳統英式教練，要喺英超生存似乎越嚟越渺茫，崔護重來嘅莫耶斯，又可以喺愛華頓主帥呢個位坐得幾耐？Willhappy