【曾智華專欄】賽馬旅遊開始成形

本欄不停鼓吹的賽馬旅遊，換局長後，有明顯進展了。元旦日沙田有四千幾遊客入場，「出閘」甚靚，且看政府及馬會能否食住上喇。

新年馬友聚首，最興奮談論的，並非元旦賽事，而是上周日第十場，306場次。點解興奮？因大家不約而同心靈相通，中到應一應！兼且好分到喜出望外。賽後睇片，無法不佩服澳洲大勢力，真真翻手為雲，覆手為雨。

唔明？易，翻睇巡邏影片，就知當今澳洲兩大高手「軟硬鞭」潘頓及「哈佬文」布文操控力有幾勁，簡直「劇本」由佢兩丁友寫，其他騎師心靈相通而配合。

首先，呢場大熱為一點九倍，看似冇得輸的「但求開心」。不過因梁家俊停賽而換上蔡明紹，已布下「輸馬」伏線。

次熱為布文的「川河帥駒」，五倍，合理，上次第四輸條頸，今鋪有機會贏得。

以上兩隻孭晒飛之下，其他全部變冷品。最怪雞兩隻，一為「風雲武士」，上次明明只輸短頭，今次跑同程，竟冷到開閘仍二十五倍。

另一更離奇的，為潘頓策騎的「飛輪步」，上次爆大冷三十三倍勝出，今次由霍宏聲換上更高級數的潘頓，竟有二十倍。

個局是否好詭異？唔合理但又唔知班友搞邊科，我與馬友四隻穿勻，買二重彩。

結果，開呀。原來是兩大師傅潘頓及布文快放做步速，掩護「澳洲儍仔」湯普新跟跑，其他騎師睇風景。犀利，四隻中最冷的行頭，次冷的第二，爆到七彩。

點解「飛輪步」及「風雲武士」可以咁冷？應該除核心人物知之外，其他全被蒙在鼓裏，應該包括練馬師！呢場玩法，必須存記。

明天二班賽事又由兩條大鱷揸莊，小弟估佢兩個玩「唔去」，讓路畀「合夥奔馳」及「駿步騰飛」。