【曾智華專欄】報名啦，有錢派呀

以前不時聽周街人亂噏：「呢個世界邊有人嫌錢腥㗎？」聽落好似好有道理，但假若講者見過世面，就知真係大把人嫌錢腥，其中一種人正是馬主，尤其擁有高班馬的馬主。

香港的級制賽，一直開放畀外地馬報名參加，今日的兩場三級賽也不例外，每場總獎金四百二十萬元 ，冠軍有二百三十多萬元。

係咪都幾多錢？睇落係，但肯定在一眾馬主及練馬師眼中，唔係！所以，12月2日截止報名時，半匹海外馬都冇，食光蛋。好嘞，咁本地馬又如何？慘慘豬，那場一千米洋紫荊短途錦標，只得四大隻報名！吓？如今跑第六都有獎金噃，點解冷落成咁？這就證實，呢個世界真係有人嫌錢腥㗎。

結果，延呀延，終於湊夠六隻出賽，其中希斯馬房隻「佳運發」，只得六十八分，與孭最重磅的蔡廄「嫡愛心」，相差三十九分，實在太太太誇張了。究竟「佳運發」會否採取步行返終點策略，純粹收八萬幾元第六名獎金就收工呢？相當有趣。

呢場個局好搞笑，最高分的「嫡愛心」，完全冇跑過一千米，難道三年後可突然變身？

希斯的兩隻，「人和家興」已經老到甩牙，八歲，兼且從冇沙田一千米上名紀錄，難道可突然馬神附體？至於「佳運發」，也是零沙田一千米紀錄，又經已七歲，匆匆報名似純為畀面馬會，令呢場好好睇睇，似有馬在競賽。

剩返三隻，「美麗第一」在季初三級賽一千米奪冠，加十分，四歲，仍有進步空間。剩下兩隻，巫偉傑「魔術控制」必成大熱，進步中。但切勿忘記阿巫師傅告東尼隻「狀元及第」呀，季初三級賽一千米第三，等呀等，終於等到起義時候，應該排第三好分，馬膽用佢啦。