【曾智華專欄】教宗選戰Vs.馬會選戰

昨日講到小弟一邊睇《教宗選戰》（注意，不是「教宗選舉」啊），一邊會心微笑，因聯想起數十年傳媒生涯中，對政治人物真偽面孔的見證。

還有，就是無端端想起馬會選主席。

點解咁過癮？無他，乃因教宗選舉與馬會主席選舉，在制度上及做法上，有點出奇地相似。因為教宗任命樞機主教，而到要選教宗時，正正又是由樞機主教投票選教宗。

馬會又如何？主席及董事由遴選委員投票選出，而遴選委員，若冇馬會董事局批准，哈，話知你會飛都無法入局。因馬會由零開始是一個密封的權力架構，無論你點講點睇點批評，都不能動搖其「精英結構」，非常之堅實。

任何人想做主席，「投票」？只是走過場的儀式，而實實在在，要鋪排N咁多年，當中的部署非常縝密，更重要是講背景，講人脈，講家族歷史……等等，普通人根本連架構最外的一層也沒機會打入。

總之，這種我選你，然後你選我的權力爭奪戰，絕少有機會爆冷，因未選之前已有結果，咪問公平不公平，總之，遊戲規則早已定下。

樞機主教來自世界各地，基本不同種族都有（似馬會遴選委員的不同光譜），有一半是屬於實際需要，一半屬於「裝飾」（Cosmetic），畀人感覺是包容無私。不過，一旦真的選舉教宗，你會天真到以為亞洲中東非洲南美的樞機會有機會勝出嗎？發夢冇咁早！

馬會主席這尊貴身份，絕對是「五十年不變」，普通人想問鼎？未到遴選委員個圈，已早早被彈走啦。

明天跑沙田，蔡神仙將又會連環出擊，七隻皆有餐士，尤其「德心知遇」、「真心傳奇」、「獵寶勤」及「安泰」，必有王者！