余迪偉問准前度先講：唔係博同情等人媾 開騷公開性生活不協調經歷畀人借鏡丨獨家

余迪偉繼2018年《一支弓》後，將於明年1月再舉行個人劇場騷《Fabulous Me》，上次成功令他更有信心，今次除繼續分享成長經歷，就連早前在網台節目公開跟前男友因性生活不協調分手一事，已問准前度開騷時都會再講。這個騷繼續希望做到傳承，例如尋找性取向心路歷程，讓觀眾作借鏡。採訪：杜杜　眼鏡:@HEALTH CARE OPTICAL@UNSUIKYO

迪偉跟前男友再見亦是朋友，公開經歷前亦有跟對方溝通好。

迪偉到旺角花園街拍攝《Fabulous Me》宣傳照。

迪偉坐屎塔影宣傳照，喻意會將最私密事在騷內分享。

迪偉搵來好友TVB《剪裁魔法師》冠軍Kev（姚子裕）設計服裝。

 迪偉坦承2018年搞《一支弓》時信心不大，擔心觀眾認為只是牙痛文章，但上次成功後不再擔心，今次形式亦跟上次一樣，「唔會有休息入去換套衫嗰啲，亦唔會有嘉賓，所有嘢都喺台上發生。」內容就離不開他的成長經歷，「始終講我嘅Life，有啲嘢係唔會變，最大分別係2018年同𠵱家相差6年，呢6年我嘅人生亦都發生咗好多嘢，2018年開騷做第2場時阿媽走咗，2022年阿爸走埋，對我成長影響好大，呢6年我情緒起伏同事業上阻礙亦好多。」

2018年，迪偉舉行首個個人劇場騷《一支弓》。

距離上次開騷，迪偉經歷了父親2022年離世。

望觀眾有所得着

早前迪偉在網上節目《絲打圍爐》指跟前男友離離合合，最終因性生活不協調分手，本來太私密沒打算公開，「對住死八婆娟姐（練美娟）同唐詩詠就講咗出嚟，佢哋都話可以唔剪出嚟，但講咗就算啦，最大考慮係對我ex（前度）有影響，訪問未出街我有同佢講過，佢話『冇所謂你又冇講我個名』。」由於事件是他最近經歷，今次開騷都會涉獵，「睇吓點講，同埋講幾多囉！我講出嚟唔係叫大家同情我，𠵱家單身大家媾我啦！我要搵個位講呢段感情經歷，令大家會身同感受，咁先有意思，唔係放上台把鬼咩！」

迪偉在網上節目《絲打圍爐》，接受練美娟和唐詩詠訪問。

迪偉現在身體狀態比上次開騷更好，因迷上打網球。

上次開騷迪偉最希望觀眾有所得着，今次都不例外，「所謂傳承係一定有共鳴，唔係一定要感動或者笑，係余迪偉係點handle失戀、同朋友決裂，親人離世時點認定嗰啲生命係過客，面對時嘅方法係會令到人借鏡，或者幫到人搵到佢嘅方法，正如我尋找性取向嗰部份，一定令到好多懷疑自己性向嘅人，啲𡃁仔𡃁妹一定會學到啲嘢，完騷時有嘢袋到走係好緊要。」

開騷之餘，迪偉仍有主持商台《口水多過浪花》。

迪偉去年簽約林盛斌（Bob）旗下經理人公司。