【曾智華專欄】《誤判》收三至四千萬元

最近朋友聚頭，頗喜歡談論電影，點解？因今年大片一套接一套，不過，投資巨大的電影並不等於收得，一切還看質素，例如謝霆鋒孭晒飛的重本之作《海關戰線》，一睇就知唔慌收得。

估票房都幾好玩。我的預測與貼馬一樣，時中時唔中。但睇完《破．地獄》，就好有信心此片將跑贏《毒舌大狀》，因劇本的深度與闊度，吸引到的觀眾年齡層及共鳴感領域，皆比《毒舌大狀》大。

看走勢（仍未落畫），到日後加埋導演版，應輕易破一億五千萬元。

剛剛睇完雷聲極大，由甄子丹台前幕後包攬的《誤判》。唔使辯論，呢位演員仍是當今全球最值錢的武打明星。

中外影壇，翻拍又翻拍而經常狂收的一個片種公式——邪不能勝正，忠人將奸人打到甩肺，最後正義得以伸張。之前當然是奸人橫行，忠良受欺，慘無人道，一定要慘到離晒大譜，令觀眾個個義憤填膺時，大俠就出現，將奸人殺個痛快，又或繩之於法，社會回復公平理性，小市民人人幸福。

大家唔使「嗤之以鼻」駁古，指真實社會並非如此。我的答案，時係時唔係，但入到戲院，就是走入夢工場，齊齊享受一種邪不能勝正的快感，只需一百幾十元，拗嚟做乜。

對，《誤判》雖然由真實案件改編（無知少年為貪幾千蚊，借地址畀朋友收毒品，結果搞到坐二十幾年監，因被屈串謀販毒），但內容大話西遊，描寫正義檢察官甄子丹的翻案過程，真真要幾戲劇性有幾戲劇性，要幾煽情有幾煽情。

不過冇問題，打得精彩，壞人被殺個稀巴爛，冇冷場，應可收三至四千萬元。