【曾智華專欄】佢真係病？

連病都畀人懷疑，證明你平時的公信力有「幾高」嘞。講邊個？當然係「軟硬鞭」潘頓啦！

過去兩日，馬友碰頭都在熱烈討論馬圈三個病人——潘頓、潘明輝及容天鵬。

點解熱烈討論？因……冇乜人信潘頓真係「病」囉。事實，佢周一早上仍嘭嘭聲龍精虎猛試閘，跟手就話感冒告假，周三唔跑。周三跑泥地，冇大賽，獎金奀豬，呢位「富豪」高手選當日「病」，唔出奇，對老潘來講，損失的獎金濕濕碎也。

結果易配七隻，跑出兩W兩Q，另兩隻也有獎金。翌日報章形容潘頓「損失慘重」，只有佢先知係咪。不過，佢都要反問自己，點解咁多人唔信佢有病。

至於「細潘」潘明輝，完全冇人懷疑佢詐病。因贏完第二場「星雲浩騰」之後，死捱到第五場後才宣布頂唔順，餘下三匹馬易配。慘！結果一W一P一第四，全有獎金，對華人騎師來講，咁先算「損失慘重」！

至於容天鵬，不單冇人會懷疑佢是否真病，反之，個個替佢打氣，因知老容個病唔簡單。幸而近日復見出現，鬆一口氣。周三所見更豐滿咗，證明開始吸收營養，好現象。大家更替佢高興為有馬贏，「逆市奇爸」勝出，給予容氏一家好大鼓舞也。

講到詐病，小弟多年公務員生涯亦目睹不少。只要你話頭暈肚痛，個個醫生都願寫一日至三日病假紙（因佢唔寫而你出事，要孭鑊）。少部分害群之馬攞咗病假，一轉身就上咗東莞。點解我知？因部門阿頭係我老友，佢一嘢就查到稱病下屬有出入境紀錄，斷正！

明日又跑馬，「神仙蔡」近期現真身，今次出「氣勢」，肯定是過關纜躉，記住留意埋「健康快車」及「鐵金剛」，另「精算暴雪」及「魅力星」也不可忽略。