【曾智華專欄】你小便，我賺錢

商業世界要成功，必須食腦，單靠食力，只能變中下層，因力個個有，腦則未必。

營商而冇腦的人，多只會長嗟短嘆，覺得乜都唔掂，冇生機與心機，猛話不如執咗佢算數。

但有腦又有力的，總會看到處處商機，包括如今香港「死氣沉沉」的飲食業。事實業內仍有不少朝氣勃勃的經營者，開完一間又一間，部分受歡迎食肆更好難訂位或要排隊。點解會咁？當然不是符碌靠運。

過去三十年，小弟不停遊走內地各省各市，見證N咁多轉變，尤其1992年鄧小平南巡之後，強調不管白貓黑貓，捉到老鼠就是好貓，這政策完全撻起人性的貪心及腦筋。

有貪念者見有油水，自會搏命，在正路邪路中奮不顧身，白貓黑貓全面湧現。

腦筋呢？以前的做又三十六，唔做又三十六，當然唔做啦。後來鄧小平指令——讓一少部分人先富起來。即係乜？即係你博，就有機會爬別人頭，成為共產主義下的首批富豪；至於用乜手段，白貓黑貓論已清楚暗示。

不過，遍地貪官群起，亦製造社會危機，故此，習近平上場前，早揚言——蒼蠅老虎一起打，準備咗多個斧頭鍘侍候貪官。

不過，貪乃人的天性。習主席上場十多年，雖日日打貪，但不少大官仍在貪，革命顯然仍未成功，幸而起碼已冇人敢明目張膽了。

冇得大貪特貪加冇政績就落台，推動地方幹部倒也非常積極搞經濟，其中一瓣為「廁所經濟」。有腦的幹部，會用廁所為政府增加收入。上周到福建，長途車中途休息商場的男廁，特多尿兜，點解？因全部有收入！任何人「殊殊」，就要「被直視」二十秒活動廣告。你小便，我賺錢，有腦！