皇馬vs巴塞傳奇表演賽 簽名會安排混亂 費高不滿憤而離場

【皇家馬德里/巴塞隆拿/費高】今晚（20日）舉行的Legends Assemble 傳奇球星表演賽系列—皇馬球星對巴塞傳奇，未開賽前已經有麻煩事件發生。早上舉行的球星見面會活動，費高為首的幾位球星疑不滿大會安排提早離場，令不少付出$6880元參加活動的球迷食白果，簽名合照一一落空。

費高。

費高。

皇馬球迷會撰文表示已經報警。

皇馬球迷購$6880元活動套票慘食白果

消息指，當初約有20多個皇馬球迷會會員購買$6880元活動套票，帶同球衣去酒店等待和球星簽名及合照。只是，主辦單位安排自己人先入場，現場人數多過100人，而且安排混亂，結果費高不滿之下提早離場。

不少真金白銀付費的皇馬球迷慘食白果，事後報警求助。大會表示會盡量將物件交給球星簽名，之後會再安排球星和球迷大合照，但就和原先承諾的一對一合照承諾有異。

皇馬球迷發出聲明報警備案

皇家馬德里香港球迷會因為不滿事件，周五下午發出聲明，表示會報警備案。

皇馬球迷聲明全文如下：

今晚就係香港皇馬巴塞傳奇賽嘅日子，而今早就係一眾皇迷十分期待嘅球員見面會(價值HKD6880）。不過，今早見面會就發生咗啲唔愉快事件，導致我地會員同有皇迷都未能同所有球員見面影相同簽名，球迷會正就事件同主辦處理，亦已同警方備案，球迷會亦會盡最大努力，去為會員追討權益。據大會在場負責人向我地當時嘅會員講，初步會安排返個同球員嘅大合照先。當然，呢個同見面會嘅活動承諾仍有距離啦，暫時大會亦都承諾會為相關球迷，將佢地嘅波衫或簽名品拎俾球員簽名後交還，總數45件，涉及卡斯拿斯11件、卡路士12件、奧雲1件、Amavisca 2件、簡拿華路6件、Karembeu 1件、Munitis 1件、其他球員11件。希望大會盡快有進一步安排，補償返各位皇迷同會員應有嘅活動項目啦。點都好啦，唔愉快事件就任何人都唔想，大會能正面處理，都可嘉嘅，希望可以盡快處理好唔，唔該晒大會同今日各方協助嘅人士。