【黃庭桄專欄】三妻四妾

跟豬朋A和狗友H兩個麻甩大叔，一邊飲啤酒，一邊談天說地，風花雪月，講一些不用負責任的話題，真爽！

幾杯到肚，三個麻甩佬自然會聊起女人。

「吖！到底係邊一條友仔，訂立一夫一妻的法例，只容許男人娶一個老婆呢？」豬朋A結婚超過二十年，活在「妻管嚴」的世界，難得老虎乸批准他這晚出來鬆一鬆，自然大吐苦水。

「咪就係！以前啲朝代，男人都係三妻四妾，幾正呀！一個用來管理成頭家，一個負責煲湯煮飯，一個善解人意，𠱁自己開心，一個樣靚身材正，夜夜享盡溫柔鄉，真係諗吓都會半夜笑醒呀！」仍是單身貴族的狗友H附和。

我替兩個大叔再來多一Round啤酒，問狗友H平日如何分配時間，左右逢源，同時擁有三個女朋友？

「有時我都戥你辛苦，撞正你生日，點樣一日走三場食生日晚餐呢？點食得落啊？仲有情人節、聖誕節呢啲拍拖季節，好難分身喎！」我見到狗友H嘴角滲出得戚的微笑。「你唔使擔心，我搞得掂喎，鬼叫佢哋都鍾意我咩？」

豬朋A靜靜地飲着悶酒，若有所思，「我真係冇你咁本事㗎！屋企淨係一個老虎乸，已經成日將我逼埋牆角，折磨到不似人形，日日拎我部手提電話檢查，慌死我出軌。如果同時間仲多一兩個女朋友，我諗我會癲咗！」

我同他乾了一杯，再好言相勸，「你同老婆今世相遇，然後結成夫婦，話唔定係你上一世叩咗一萬個響頭，求佛祖成全你哋今世開花結果呢！」

相戀，是緣，也可能是債，共行時用心去愛，離別時淡然相送。