【曾智華專欄】成功者找方法，失敗者……

過往日子，有幸遇到不少成功者，與這類人做朋友，非常有滿足感，因佢哋絕不怨天怨地，只積極解決問題。當然，我也會遇到不少日賴夜賴的失敗者。賴乜？正是我失敗，唔關我事，只關其他人事！

你一定聽過——心態決定高度。任何團體及社會，皆是個三角形，多數人沉底，點解？不是因為不幸或被歧視，而是根本冇興趣將自己提升到一個又一個更高的層次。

以前有位明燈式上司，對初升管理層同事必再三提點——成功者找方法，失敗者找藉口。起初我的感受不太深，但隨着日子過去，咦……果然中到開巷噃。不單身邊人，放大到整個社會，例子觸目皆是。

縱觀官場，其實也如是，坐到決策層的局長，間中也有三兩個，凡見問題就閃，又或找藉口推搪點解負責的項目唔掂，但從不見佢積極搵方法搞返掂。

納稅人個個月畀幾十萬元養佢哋，實在揼心又冤枉。

例如小弟曾在本欄再三呼籲某某高官：「喂，唔該你搞返生個吸遊客的海鮮中心鯉魚門啦，不如我請你去食餐飯，話你知點搞啦。」冇回應。

又講：「喂，個郵輪碼頭其實可以咁咁（搞「郵輪碼頭管理局」，以商業形式運作）。」擺明切實有可能的，佢同樣乜都卸。

呢呢，本來香港最引以為傲的賽馬事業，早已在國際空前成功，積極點，必定可成香港旅遊業招牌。特首都打晒開口牌要搞賽馬旅遊，而上周香港國際賽，冇乜外地人，都有八萬人入場，擺明極大隻「鹿」就在眼前，又走雞，吹脹！

明天一千米賽事，「舉步生風」必熱到顛，但「星際快車」有機會劏佢！拖埋容大夫隻「占士德」，鼓勵弱家！