【曾智華專欄】詹培忠性格決定命運

新聞片上，見到七十七歲的詹培忠，拿着枴杖，有點吃力地步上法庭樓梯，眼神仍然倔強，兼且有點串串貢，臨宣判仍擺出個「硬漢」款。結果被定罪，繼續「硬」，透過律師表示不會求情，先坐一個月，明年1月8日判刑。

香港傳媒界從業員，無論是體育版、財經版或政治版，資深的，一定曾與佢有交往，因佢涉獵界別極廣。

今日標題，小弟指老詹性格決定命運，正因佢在不少地方有天分，尤其賭博及股市中的蠱惑招，的確比普通參與者高幾班，所以，早早已經搵到上晒岸。有錢加上覺得精明過人，怎不擺出目空一切款。就算在議會發言，也同樣口沒遮攔，窒人唔使本，語不驚人死不休；就算入獄後，仍絲毫無改其超級牙擦作風。

相信正是自覺叻過人、醒過人，故將自己一次又一次推入險境。

今一輩記者，絕少接觸詹培忠，但上一輩跑政治線的，肯定對佢有感覺，尤其是女的，更必憎死佢，因老詹明刀明槍歧視女性，曾在立法會發言時，貶低及侮辱女性（但受議會以發言自由保護），最著名又如今網上成為佢語錄的，正是——十個女人，十個是妓女（用詞不是妓女，而是最不堪的家禽）。

這句說話彈出時，個個你眼望我眼，O晒嘴，這樣低賤形容，竟出自「尊貴議員」的口，令不少議員立即與佢劃清界線，恥與為伍。

見證老詹毫無分寸亂噏，我也有一次，時為上世紀九十年代初：「曾先生，大部分港督乃鄉下佬，未來港時只在批薯仔，根本飲唔起貴價紅酒。就算肥彭，我第一次見佢，請佢飲拉弗，條友眼都光晒，喺英國邊有機會飲？」佢簡直不知尊重為何物。