【曾智華專欄】高層勿齋噏，自己試

小弟上周坐國泰航空，慘被「控制」十小時，斷糧而幾乎餓暈經歷，老友間轟傳。之後正式電郵國泰客戶服務部投訴，奇怪，連Acknowledge Receipt都冇，零回應，唔知間公司搞乜？難道要直接搵CEO林紹波？

剛與幾位老友晚飯，當中一位是歐洲航空公司高層，來港探女友，聽到我的慘痛經驗，輕輕拋下一句：「What A Farce！」

某大狀則嘻嘻笑：「碌Sir，呢單嘢有得告喎，民事訴訟贏硬㗎，有冇興趣去馬？」

另一位香港名字響噹噹的大集團退休高層C爺，素來對香港一切上心上腦，尤其涉及國際形象：「你的遭遇，航空公司管理層簡直不知所謂！」

嘩，開波就好猛火，全場靜默，佢咁鬼有江湖地位，以前跟佢的高層，見親都腳軟！

「我在位時的公司，形象良好，絕無荒謬情況出現，因規定所有管理層，必須輪流做客，真真正正試吓客人的感覺！」

即係點？C爺規定所有高層出Trip，八成時間不准坐頭等或商務位，必須坐經濟位，以體驗最大公約數乘客的感受，一有唔妥，立即改善。

C爺進一步指出，任何政府高官及大集團管理人，最忌高高在上。高官出入有司機，若唔走入民間，就會儍下儍下連八達通都唔識用，鬧出不知何處買廁紙鬧劇。故此，入境處及運輸署等阿頭，必須試試自己排隊。

做服務業的，例如飲食業，更應由洗廁所落單執枱開始，並第一線接觸客人。

究竟香港今時今日，還有無C爺呢類堅持以客為尊的管理人呢？

係嘞，哈，究竟與我一同享用國泰航空「禁食」鬧劇的二百名乘客，當中會否最少有一位是國泰航空高層呢？若有，佢又會點諗呢（一早轉機走咗？）？