吳浩康任歌唱比賽評判 拒認榮升「老闆」？自謙只是個判頭

吳浩康、Manson張進翹、Kendy孫曉賢日前出席《The Singleton Just Sing》歌唱比賽總決賽，並為活動獻唱歌曲，DJ阿正擔任大會司儀，而吳浩康更擔任比賽評判，佢仲爆另一評判舒文「金句王」評參賽者。

Deep表示現身歌唱比賽勾起出道時回憶，近日開設建築公司榮升「老闆」行列：「其實我是召集了一班朋友一起去開工，但是朋友當中要找一個代表，所以我去開一間公司去代替大家收錢，所謂自己公司做第一單工程，就是口中所謂建築公司老闆，我真的絕對是一個小判頭當中的小判頭，保障工友會有糧出。（太太幫你管數？）我老婆不會那麼笨，你會唔會成日想同個傻佬一齊做嘢？我成日都會蝦老婆，所以老婆先唔會咁笨。」

Deep就話與Steven張致恆有聯繫，但無意聘請對方做「員工」：「我未必請得起他！他私下有找過我，總之有些條款我又未必會立刻行動。坦白說，他沒有問過我，我不是說我可以請他，只是他來找我的話，我也歡迎。（點解請他不起張致恆？他人工高？）我請完他之後引來注目，會很有多人來影他！我請佢等於搞佢，其實每一次攞我地做對比，我都會唔開心，因為我地係朋友！」Deep早前應邀接受田蕊妮訪問，得知對方做手術，為免打擾對方未計劃探望，但會為她送祝福。

同場嘅Manson張進翹笑言參加者質素高，入場偷師重拾入行初心，佢呢日仲自爆同釗彤齊推新歌，MV夠晒甜蜜：「我地會推出一首關於冬日嘅新歌，希望在聖誕的時候送給大家做聖誕禮物。（MV會錫？）我地錫咗少於十次啦，對我嚟講挑戰也頗大！（螢幕初吻？）好像是啊，所以希望這首歌有一個好的成績。這次也是第一次，跟釗彤的團隊監製合作。（佢奪你初吻有冇封利是比你？）仲未！我要問翻佢攞。」

而Kendy孫曉賢就話想參拍攝真人騷，無懼素顏上鏡：「因為我係音樂人，沒有『偶包』，依家我準備搞畫展，將音樂同書法結合，唔知嚟緊過年係咪可以擺街站幫人寫揮春，順便宣傳新歌。」