專欄 Will知足球｜車仔三兄弟可以並存？

從前有個故事關於三兄弟，大佬、二佬同埋三佬都係瞓同一間房，不過間房永遠只係得兩張牀，大佬因為扯鼻鼾扯得太勁，二佬又成日翻身瞓，所以永遠都唔啱。三佬永遠都係無乜所謂，有得瞓就得，所以大佬同二佬總有一個都會逼於無奈而要坐凳仔無得瞓。

但係有時三佬離家出走，剩番大佬同二佬，咁有牀瞓都要瞓，但係就瞓得差啲囉。經歷咗兩年，老竇終於搞掂呢三兄弟，調咗二佬去隔籬房，咁咪大家舒服。

大佬安素費南迪斯、二佬摩西斯卡些度、三佬羅美奧拉維亞喺星期日對維拉嘅賽事首次同場，係一個幾驚喜嘅組合，因為老竇馬列斯卡將馬路古斯圖放喺後備，用卡些度踢右閘，令拉維亞成為中場嘅潤滑劑，同時安素可以推前一格，效果唔算差，保持到零失球，連安素自己都有波入。

不過都要睇下二佬卡些度如何適應間新房，因為見到佢喺幾次攔截都差啲甩，再加上位置感都要進一步提升。呢個都係需要解決嘅課題，睇下老竇點樣將呢三兄弟慢慢磨合。Willhappy