美股牛市死唔斷氣 見頂要睇一個現象｜晉佳

美股主要指數勢如破竹，喺美國經濟數據理想、通脹未達2%目標而呈現健康趨勢下，美股暫時仍保持有調整、冇大跌嘅格局。美股要見頂，先要出現技術嚴重超買，暫時遠未見到。

今年美國感恩節檔期銷售表現唔錯，據Adobe analytics數據顯示，網路星期一銷售按年升6%。大家或許有發現，今年感恩節減價力度並不多，銷售依然亮麗，證明網路消費力相當好，係經濟動力充足嘅象徵。

良性通脹唔係壞事

與此同時，美國減息速度不如預期，一來經濟情況容許減少啲息，二來通脹未達2%目標。不過，早兩個月曾出現服裝通脹回升，似乎係消費理想、減價幅度低所帶來嘅結果，呢種良性通脹，唔係壞事，並非貨幣政策過度寬鬆所帶來嘅惡性通脹表現。

投資者其中一個擔心位，係美國政府債務高企，令利息開支加重財赤負擔，政府加大發債自然扯高美債孳息率，令美息居高不下。特朗普將成立政府效率部門、由Tesla嘅馬斯克統領，算係對症下藥嘅方法，即使未知實行上有幾大阻力，始終係做對事，投資者身體力行買入股票以示支持。

踏入年尾，似乎美股大牛可以安然度過2024年，或許明年上半年先有機會出現嚴重技術超買，例如周線RSI雙頂背馳等訊號，現階段毋須過慮。噚晚輪到台積電（TSM）及博通（AVGO）發力，晶片股似復蘇，仍可追入。

晉佳

https://www.patreon.com/user?u=28525578

相關文章：

維他奶大戰未到戲肉｜曾智華

恒指連日企穩10天線 有望上試兩萬關 郭Sir卻指有一點美中不足

Clockenflap光環褪色：盛事經濟如何迎合Gen Z世代？｜梁偉聰

退休期有幾長難掌握 李聲揚分享三種預算方法 「最怕人在天堂錢在銀行 沒享受過人生」

恒指過去25年升45% 年均回報僅1.5% 林本利：盈富未能創造財富