維他奶大戰未到戲肉｜曾智華
不講不講還須講，因事情實在發展得太精彩。講乜？正是過去3星期本欄主題——維他奶國際（345）的不尋常爆升！
大半個月前小弟推介此股，主因發現新加坡首富黃廷方家族欲購入維他奶「雙劍合璧」，目標與旗下楊協成集團產生協同效應，應想成為全球非汽水第一王國？
這個行動對維他奶股價乃百分百好消息，不過似乎市場關注的人不多，一眾股評人也未有作甚麼分析。小弟拆解手頭資料後，就在9元價位買入，並在此公布，繼續關注其變化。
羅友禮點會「唔知佢想點」
結果近兩周維他奶股價及成交量不斷爬升，戲劇性一幕就在上周業績公布後出現。記者趁機當場訪問主席羅友禮，佢當然唔會答，只拋下一句：「我都唔知佢想點」！
佢點會唔知人哋想吞咗成個維他奶集團吖！業績公布後，兩股神秘勢力立即展開對決，一股繼續掃入，一股大力沽空，後者意圖將股價推低。上周三股市一開即出現最精彩刺激一幕，股價先被刻意做低到9.9元，豈料即刻中招！其實維他奶成個大勢正在不斷飆升，做低真的是找死，肯定被夾。
果然當日沽空者被夾瓜，因股價反手已升上12.88元的今年新高，我作為揸咗少少的參與者，也睇到目定口呆，大勢已成，真係邊個沽空邊個死。
當然筆者手機又響個不停，一眾粉絲們都覺得短期內有3成幾利潤太夢幻，個個問：「碌Sir，是否應該止賺？」
和氣生財或一決雌雄也利股價
小弟永恆答案：「我只協助大家作分析，希望各位自己思考，首先應從整個大走勢觀察，再作決定。」個人又如何？當然是覺得最高潮戲碼只是剛剛開始，這場戲其實黃廷方家族已清楚講出——我哋想點，亦會繼續行動下去！
理性策略，維他奶最佳對應，是畀個價對方，用中國人傳統方式——和氣生財。若採取戰鬥格，則會變無無謂謂燒銀紙。
揸咗維他奶的小股民則發達，因無論是和氣生財或一決雌雄，結果都有利股價。嗱！唔好再問我應否「落車」咁膚淺喇。
資深傳媒人 曾智華
相關文章：
退休期有幾長難掌握 李聲揚分享三種預算方法 「最怕人在天堂錢在銀行 沒享受過人生」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
