【曾智華專欄】空中監倉無望地等

寫此稿時，正是英雄被困機艙中的一張窄窄經濟位，作無望的苦等，不知何時了。

我絕對知安全第一，故不似其他乘客，輪流狂問空姐空少：「究竟幾時飛得呀？」

若果飛得，早飛咗啦，正正是因機長宣布：「因零件有問題，現正搶修，請安坐座位中，希望盡快修理完成起飛！」

其實經常飛者，無人不知航班延遲閒過立秋。

不過……周一小弟搭CX 630由泰國曼谷返港，安排下午四時五十五分起飛，幾百乘客（全機爆滿）在四時已乖乖坐在候機室等。

但一分一秒過去，到五時半仍未有公布，再等呀等，第一次公布，五時四十五分可登機，人人面露笑容。

點知……去到六時仍冇動靜，只見地勤人員低頭默然。六時半，開始有人按捺不住衝向櫃位，猛問究竟幾時飛得？你叫地勤點答？唯有話：「等機長公布。」

終於七時得喇，宣布修理完畢，可以上機，七時半起飛。全機坐定定，但到咗七時半，仍未見空姐檢查安全帶。即係……唉！幸而七時四十五分，機長指示空姐安全檢查，完畢，飛機開始移動，十分鐘後升火待發，大家當然諗，得喇，三個鐘頭後可回到香港喇。

不過，慘情，此時機長突然又開咪，小弟心諗，咁即係「瀨嘢」啦。果然宣布：「各位乘客，基於又再有零件出現問題，現需駛回停泊處修理，對唔住！」

又中空寶，寫此稿時，肚仔打鼓，躁乘客不停問空姐空少：「究竟搞乜？幾時先掂？」你叫佢哋點答？唯有速速倒過百杯清水及放小包花生任取，頂住。

執筆至此，已經十時半，仍陷無望的等。我多次表示拒絕再坐長途機，正因有航機監倉恐懼症。點知今次短短飛曼谷，一樣領嘢，真吹脹。