【曾智華專欄】電子現金券的誘惑

商業機構為吸引兼勾住你消費，絞盡腦汁創造N種花樣，目標就是針對人性的貪。正是唔怕你精、唔怕你呆，最怕你唔貪又唔來，冇晒返頭幫襯肥水魚，點掂？

近兩年最盛行的，正是電子現金券，最搵老襯是並非真現金，而是電子券，條件多多，你必須幫襯幾多幾多錢，甚或指定買乜才可用。唔用？可能幾日內報廢，令你覺得蝕底。

呢招肯定好掂，故此，各大地產集團旗下商場，全部火速執行，所有零售集團又用，兩大超市更加用用用！

好笑在以上集團收銀，多為師奶級阿姐，佢哋真誠地非常肉緊又好心，凡見我找數冇用或未用現金券，必定火速提點：「哎吔，先生，你有XX張現金券未用呀，就快過期㗎喇。」

有次過癮，小弟答：「個戶口唔係我㗎，係老婆大人㗎！」

阿姐冇理後面等緊畀錢人龍，大大聲指示：「咁你快啲返屋企通知老婆啦，否則……」

另外近日手機不停彈出N種各類電子消費券訊息，簡直「走避不及」！點解佢哋知我電話及電郵？簡單，因個個商場皆如是，唔入會冇消費優惠泊車，你點會唔入？一入就自動交出所有聯絡方式。

昨日晚飯，又有單過癮嘢。老友「精明R」剛剛去完歐洲郵輪Tour，眉飛色舞形容處處幾鬼靚。講講吓，佢話：「哈，唔知點解，有日架船突然話零件壞咗要換，延遲咗兩小時，之後幾慷慨呀，人人回水兩百美元呀！」我一聽：「嘩，好大隻蛤乸啫，邊間公司？結果，你兩百美元點使咗佢呢？」

「唔可以四圍用㗎，畀嘅係電子現金券，只限我地明年若再報團時，先可以用㗎！」小弟立即小人之心上身，應咪又係……