【曾智華專欄】頂佢唔順！我移民

邊個頂邊個唔順，要移民？喂喂，唔係我，我是打都唔走一類，更不會因頂一個人唔順而改變自己的生活與生命，選擇移民。

憤而講出今日標題兩句的，乃與小弟五十年前一同往美國留學的死黨H佬，時為1975年，當年的美國，代表開放、自由、年輕、活力、人權、民主、創新、科技、前衛、包容、平等、友愛……全球年輕人嚮往的種種價值觀念，有齊。

正常地，人人由外形到思維抄足美國，有機會更爭取到美國讀書，因的的確確，不少頂尖大學就在美國。

結果大學畢業後，H佬留在美國繼續深造，碩士、博士一路讀，我則自知不是做學問材料，學士畢業後，立即飛身回港工作。

H佬的人生軌跡，自然是留在美國開展事業，並申請入籍，做個真真正正的美國人，居住在最多精英的紐約，並結識大量同聲同氣知識分子，公餘時間大擺沙龍，討論如何make the world a better place，關心美國，關心世界。

這樣一類的知識分子，事事堅持講守法、守禮、道理、邏輯、尊重、品味……你話嘞，自從特朗普獲選成為總統之後，有幾大的內心震撼？當然，一切不會無緣無故發生，但東西兩岸的知識分子，總極討厭特朗普以癲狂橫蠻市儈形象，代表美國遊走國際，感到羞恥。

狂特第一次當選，H佬及同路人個心諗：「好，忍你四年，咁款必定下台。」結果真的做了四年下台。不過……慘情，今次噩夢又再成真！

上周回港共聚，飲多兩杯後話：「阿碌，今時今日，我真係Shame to be an American！一條罪犯惡棍歧視女性及移民者，繼續囂張掌權做總統，我真係頂佢唔順嘞，年尾會全家移民上加拿大，冇眼睇！」